សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើម្បីដោះស្រាយបញ្ហាស្ទះចរាចរណ៍នៅតំបន់ផ្លូវជាតិលេខ១ រដ្ឋបាលសាលារាជធានីភ្នំពេញ បានសម្រេចបង្កើតផ្លូវថ្មីមួយខ្សែ តភ្ជាប់ពីផ្លូវជាតិលេខ១ទៅគល់ស្ពានឆ្លងទន្លេបាសាក់ ព្រែកប្រា ចាក់អង្រែក្រោម កាត់តាមតំបន់អភិវឌ្ឍន៍លំនៅឋានប៉េងហួតបឹងស្នោរ ។ នេះបើតាមការប្រកាសពីឯកឧត្តម ឃួង ស្រេង អភិបាលរាជធានីភ្នំពេញ ក្នុងឱកាសអញ្ជើញពិនិត្យការដ្ឋានសាងសង់ស្ពានឆ្លងទន្លេព្រែកប្រា ចាក់អង្រែក្រោម នៅរសៀលថ្ងៃទី៣០ ឧសភា ២០២៤ ។
ឯកឧត្តម ឃួង ស្រេង បានមានប្រសាសន៍ថា តំបន់ផ្លូវជាតិលេខ១ឃើញថាមានបញ្ហាកកស្ទះចរាចរណ៍ច្រើន ទោះបីជាស្ពានឆ្លងទន្លេកោះពេជ្រ កោះនរា ត្រូវបានសាងសង់ និងដាក់ឱ្យប្រើប្រាស់ក្ដី ព្រោះពលរដ្ឋជាច្រើនត្រូវធ្វើដំណើរទៅកាន់តំបន់ផ្លូវ៦០ម៉ែត្រ និងតំបន់ខណ្ឌមានជ័យ ដូច្នេះហើយទើបសាលារាជធានីភ្នំពេញសម្រេចបង្កើតផ្លូវថ្មីមួយតភ្ជាប់ពីផ្លូវជាតិលេខ១ ទៅគល់ស្ពានព្រែកប្រា ចាក់អង្រែក្រោម ។
ឯកឧត្តមបន្តថា ស្ពានកោះពេជ្រ កោះនរា បានជួយរំដោះការកកស្ទះចរាចរណ៍ត្រឹមតែប្រមាណ៣០ភាគរយប៉ុណ្ណោះ ។ សម្រាប់ផ្លូវ និងស្ពានថ្មី តភ្ជាប់ពីតំបន់ព្រែកប្រា ទៅកាន់ចាក់អង្រែក្រោម នឹងជួយរំដោះចរាចរណ៍បានច្រើនលែងមានការកកស្ទះទៀតនោះទេ ។
ជាការកត់សម្គាល់ តំបន់ច្បារអំពៅ ឬតំបន់ផ្លូវជាតិលេសខ១នេះ រហូតមកដល់ពេលនេះមានស្ពានតភ្ជាប់ចេញពីភ្នំពេញចំនួន២ និងកំពុងសាងសង់ស្ពានមួយទៀត សរុបទាំងអស់ចំនួន៣ ។ ការសាងសង់ស្ពាន និងផ្លូវថ្មីតភ្ជាប់ពីផ្លូវជាតិលេខ១ ទៅតំបន់ចាក់អង្រែនឹងអាចជួយឱ្យតំបន់ទាំងពីរកាន់តែខិតជិតគ្នា ហើយជំរុញឱ្យតំបន់ទាំងពីរនេះកាន់តែមានសក្ដានុពលបន្ថែមទៀត ជាពិសេសតំបន់ផ្លូវជាតិលេខ១ ។
បើតាមលោក ប៉ូ អ៊ាងគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ឱ្យដឹងថា តំបន់ផ្លូវជាតិលេខ១ គឺជាតំបន់ដែលមានសក្ដានុពលលើការអភិវឌ្ឍលំនៅឋាន ដោយបច្ចុប្បន្ននេះ ឃើញមានក្រុមហ៊ុនអភិវឌ្ឍន៍លំនៅឋានជាច្រើនបានចូលទៅតំបន់នោះ ដើម្បីអភិវឌ្ឍន៍លំនៅឋាន ជាពិសេសលំនៅឋានដែលមានតម្លៃខ្ពស់ៗ ហើយមានពលរដ្ឋជាច្រើនក៏បានទៅទិញលំនៅឋាននៅក្នុងតំបន់នោះដើម្បីស្នាក់នៅផងដែរ ។
គួរបញ្ជាក់ថា ការសាងសង់ហេដ្ឋារចនាសម្ព័ន្ធថ្មីៗនៅតំបន់ណាមួយនឹងជួយឱ្យតំបន់នោះកាន់តែមានការចាប់អារម្មណ៍ពីអ្នកវិនិយោគចូលទៅតំបន់នោះដើម្បីអភិវឌ្ឍ ជាពិសេសលើសំណង់អចលនទ្រព្យ រួមមានលំនៅឋាន ផ្សារទំនើបជាដើម ។ ជាក់ស្ដែងតំបន់ផ្លូវ ៦០ម៉ែត្រក្នុងរយៈពេលប្រមាណ១០ឆ្នាំចុងក្រោយបានអភិវឌ្ឍន៍ហេដ្ឋារចនាសម្ព័ន្ធផ្លូវ ខ្វាត់ខ្វែងហើយក៏ឃើញមានក្រុមហ៊ុនអភិវឌ្ឍន៍លំនៅឋានជាច្រើនចូលទៅអភិវឌ្ឍន៍ជាច្រើន ដោយផ្សារទំនើបតូចៗធំក៏បានចូលទៅអភិវឌ្ឍន៍ដើម្បីបំពេញបន្ថែមតម្រូវការផងដែរ ៕
Account
Security
Favourite Content