បរទេស៖ យោងតាមប្រភភព័ត៌មានពី CNA បានរាយការណ៍ថា  រដ្ឋមន្ត្រីការបរទេសនៃបណ្តាសមាជិកក្រុមប្រទេស BRICS បានជួបប្រជុំគ្នាក្នុងគោលបំណងបង្កើតកម្លាំងរួបរួមមួយសម្រាប់ទប់ទល់នឹងគោលនយោបាយពាណិជ្ជកម្មរបស់ប្រធានាធិបតីអាម៉េរិក លោក Donald Trump ។

កាលពីថ្ងៃចន្ទ អ្នកការទូតកំពូលៗមកពី ១១ ប្រទេសដែលជាសមាជិក BRICS រួមមាន៖ អេហ្ស៊ីប អេត្យូពី ឥណ្ឌា ឥណ្ឌូនេស៊ី អ៊ីរ៉ង់ អារ៉ាប៊ីសាអូឌីត អាហ្រ្វិកខាងត្បូង និងអេមីរ៉ាត់អារ៉ាប់រួម បានជួបប្រជុំគ្នាដើម្បីរៀបចំរបៀបវារៈរបស់ពួកគេមុនពេលមានកិច្ចប្រជុំកំពូលមេដឹកនាំនៅខែកក្កដាខាងមុខនេះ។ កិច្ចប្រជុំនេះធ្វើឡើងក្នុងគ្រាដ៏សំខាន់សម្រាប់សេដ្ឋកិច្ចពិភពលោក បន្ទាប់ពីមូលនិធិរូបិយវត្ថុអន្តរជាតិបានកាត់បន្ថយការព្យាករណ៍កំណើន ដោយសារមានផលប៉ះពាល់ពីពន្ធគយថ្មីរបស់អាម៉េរិក។

រដ្ឋមន្ត្រីការបរទេសប្រេស៊ីលលោក Mauro Vieira បានសង្កត់ធ្ងន់លើសារៈសំខាន់នៃវិបត្តិមនុស្សធម៌ ជម្លោះប្រដាប់អាវុធ អស្ថិរភាពនយោបាយ និងការលុបបំបាត់ពហុភាគីនិយម ហើយតួនាទីរបស់ BRICS ជាលក្ខណៈក្រុមគឺសំខាន់ជាងពេលណាទាំងអស់។ មិនត្រឹមតែប៉ុណ្ណោះ អំណាចនៃប្រាក់ដុល្លារនៅតែជាបញ្ហាប្រឈមរបស់ BRICS ហើយវានឹងក្លាយជាប្រធានបទសំខាន់នៅក្នុងរបៀបវារៈ។ នៅក្នុងកិច្ចប្រជុំកំពូលមួយកាលពីឆ្នាំមុន សមាជិក BRICS បានពិភាក្សាអំពីការជំរុញប្រតិបត្តិការមិនមែនប្រាក់ដុល្លារ ប៉ុន្តែត្រូវបាន Donald Trump គំរាមកំហែងជាមួយនឹងការដាក់ពន្ធ ១០០% ប្រសិនបើពួកគេកាត់បន្ថយការប្រើប្រាស់រូបិយប័ណ្ណអាម៉េរិក។ ចាប់តាំងពីកាន់តំណែងជាប្រធានាធិបតីជាលើកទីពីរមក Trump បានប្រកាសពន្ធតបតឲ្យមានភាពស្មើគ្នាលើប្រទេសជាច្រើន ប៉ុន្តែបានពន្យារពេលរយៈពេល ៩០ ថ្ងៃ លើកលែងតែប្រទេសចិនត្រូវបានយកពន្ធរហូតដល់ ១៤៥% ហើយទីក្រុងប៉េកាំងបានវាយបកមកវិញជាមួយនឹងពន្ធចំនួន ១២៥% លើទំនិញរបស់អាម៉េរិក។ ចិនបានចាត់ទុកពន្ធគយរបស់អាម៉េរិកជាលទ្ធិឯកតោភាគីនិយម និងការគំរាមកំហែង។

ចាប់តាំងពីឆ្នាំ២០០៩ មក BRICS បានពង្រីកសមត្ថភាពយ៉ាងខ្លាំង ខណៈដែលមានប្រទេសសេដ្ឋកិច្ចធំៗដូចជា ប្រេស៊ីល រុស្ស៊ី ឥណ្ឌា និងចិន ជាបង្អែក។ ឥឡូវនេះ ក្រុមប្រទេស BRICS មានចំនួនប្រជាជនជិតពាក់កណ្តាលនៃចំនួនសរុបប្រជាជនពិភពលោក, មានចំណែក ៣៩% នៃផលិតផលក្នុងស្រុកសរុបរបស់ពិភពលោក, និងកាន់តែមានឥទ្ធិពលលើឆាកអន្តរជាតិចាប់តាំងពីពាណិជ្ជកម្មរហូតដល់បញ្ហាភូមិ​សាស្ត្រ​នយោបាយដូចជា ហ្គាហ្សា និងអ៊ុយក្រែនជាដើម។ ទន្ទឹមនឹងនេះ រដ្ឋមន្ត្រីការបរទេសប្រេស៊ីលលោក Mauro Vieira បានបើកកិច្ចចរចាជាមួយការអំពាវនាវឱ្យមានការដកទ័ពអ៊ីស្រាអែលទាំងស្រុងចេញពីតំបន់ហ្គាហ្សា និងអំពាវនាវឱ្យរុស្ស៊ី-អ៊ុយក្រែនមានដំណោះស្រាយបែបការទូត ដែលគោរពតាមគោលការណ៍នៃធម្មនុញ្ញអង្គការសហប្រជាជាតិ៕