សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រោយចូលឆ្នាំប្រពៃណីជាតិខ្មែរ បណ្ដាខេត្តនានានៅទូទាំងប្រទេសកម្ពុជាបានប្រកាសពីការបញ្ចប់ការវាស់វែងដីធ្លីមានលក្ខណៈជាប្រព័ន្ធជាបន្តបន្ទាប់ ហើយការងារបន្ទាប់គឺចុះបញ្ជី និងចេញបណ្ណសម្គាល់ម្ចាស់កម្មសិទ្ធិអចលនវត្ថុជូនពលរដ្ឋ។ ប៉ុន្តែអ្វីដែលកាន់តែសំខាន់ និងស្ថិតក្នុងគោលនយោបាយរបស់រាជរដ្ឋាភិបាលកម្ពុជា គឺធ្វើយ៉ាងណាឱ្យប្រជាពលរដ្ឋមានជីវភាពកាន់តែល្អប្រសើរឡើងបន្ថែមទៀត។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងក្នុងពិធីប្រគល់បណ្ណកម្មសិទ្ធិជូនពលរដ្ឋក្នុងខេត្តកំពតកាលពីពេលថ្មីៗនេះបានឱ្យដឹងថា បន្ទាប់ពីបញ្ចប់ការងារវាស់វែងដីធ្លីរួច ការងារបន្ទាប់គឺធ្វើយ៉ាងណាត្រូវកសាងជីវភាពរបស់ពលរដ្ឋឱ្យល្អប្រសើរឡើង តាមរយៈវិស័យសក្ដានុពលនៅតាមបណ្ដាខេត្តនានាទូទាំងប្រទេស។ ជាក់ស្ដែង សម្រាប់ខេត្តកំពតក៏ដូចគ្នា ត្រូវធ្វើយ៉ាងណាកសាងជីវភាពរបស់អ្នករស់នៅក្នុងខេត្តកំពតឱ្យមានភាពល្អប្រសើរឡើងពីមួយថ្ងៃទៅមួយថ្ងៃ តាមរយៈវិស័យកសិកម្ម ឧស្សាហកម្ម និងទេសចរណ៍ ។
ឯកឧត្តមបានបន្តថា សម្រាប់កម្ពុជាពេលនេះ គឺជាប្រវត្តិសាស្ត្រដែលបានបញ្ចប់ការវាស់វែងដីធ្លី និងចេញបណ្ណជូនពលរដ្ឋជាបន្តបន្ទាប់ ដែលកន្លងមកកម្ពុជាមិនធ្លាប់បានបញ្ចប់ការវាស់វែងដីធ្លីបែបនេះទេ ។ ការបញ្ចប់ការវាស់វែងចុះបញ្ជី និងចេញបណ្ណកម្មសិទ្ធិជូនពលរដ្ឋនេះដែរក៏នឹងបញ្ចប់វិវាទដីធ្លីរវាងពលរដ្ឋ និងពលរដ្ឋ ដោយមិនចង់បើកភ្នែកឡើងពលរដ្ឋមានទំនាស់រឿងព្រំដី រឿងដីធ្លីនេះនោះទេ ។
ជាមួយគ្នានេះ ឯកឧត្តមឧបនាយករដ្ឋមន្ត្រីក៏បានអំពាវនាវឱ្យពលរដ្ឋដែលទទួលបណ្ណកម្មសិទ្ធិដីធ្លីនេះ សូមយកទៅប្រើប្រាស់ដើម្បីជាប្រយោជន៍ដល់សេដ្ឋកិច្ចគ្រួសារ និងសូមថែរក្សាឱ្យបានគង់វង្ស ទុកជាកេរសម្រាប់កូនចៅជំនាន់ក្រោយៗទៀត ។
សូមរំលឹកដែរថា សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក៏ធ្លាប់បានលើកឡើងផងដែរថា ពាក់ព័ន្ធនឹងការបញ្ចប់ការវាស់វែងដីធ្លីនេះ អាចនឹងទាក់ទាញវិនិយោគិនទៅបណ្ដាក់ទុនវិនិយោគនៅតំបន់នោះបានមួយកម្រិតផងដែរ ដោយវិនិយោគិននឹងមិនស្មុគស្មាញក្នុងការសម្រេចចិត្ត ព្រោះទីតាំងដីសម្រាប់ការវិនិយោគ និងអភិវឌ្ឍសុទ្ធតែមានប្លង់កម្មសិទ្ធិត្រឹមត្រូវ ច្បាស់លាស់ ដោយមិនអាចបន្លំបានឡើយ ។
គិតត្រឹមខែឧសភា ឆ្នាំ២០២៥ តាមបណ្តារាជធានី-ខេត្ត ទទួលបានលទ្ធផលវាស់វែងបានចំនួន ១៣ ៣៣៧ ៥០៧ ក្បាលដី លើក្បាលដីប៉ាន់ស្មានសរុបនៅទូទាំងប្រទេស ចំនួន ១៣ ៦៥១ ៩៦៣ ក្បាលដី។ ខេត្តចំនួន ១៣ បានបញ្ចប់ការវាស់វែងដីធ្លីមានលក្ខណៈជាប្រព័ន្ធ ក្នុងនោះ ៧ខេត្តប្រកាសបិទបញ្ចប់ការងារវាស់វែងដីធ្លីមានលក្ខណៈជាប្រព័ន្ធជាផ្លូវការ ហើយក្បាលដីមិនទាន់បានវាស់វែងសរុបចំនួន ៣១៤ ៤៥៦ ក្បាលដី ៕
Account
Security
Favourite Content