ភ្នំពេញ ៖ ស្វាយរៀង ត្រូ​វបានចាត់ទុកថាជាខេត្ត​មួយដែលមានភាពទាក់ទាញសម្រាប់ការវិនិយោគក្នុង​ចំណោ​ម​​បណ្ដាខេត្ត​នានា​ទូទាំងប្រទេស​កម្ពុជា ហើយគិតមកដល់​បច្ចុប្បន្ន​ ខេត្ត​ដែលមានសក្ដានុពលមួយនេះ​មាន​តំបន់សេដ្ឋកិច្ច​​ពិសេស​កំពុងដំណើរការរហូតដល់​ ១៣ទីតាំង ដែលដើរតួនាទីជា​ក្បាលម៉ាស៊ីនយ៉ាងសំខាន់​ក្នុងការស្រូបយក​គម្រោងវិនិយោគនានាដ៏មានប្រសិទ្ធភាពបំផុត ។

យោងតាមសេចក្ដីប្រកាសព័ត៌មាន​របស់ក្រុមប្រឹក្សាអភិវឌ្ឍន៍កម្ពុជា CDC បាន​​​ឱ្យដឹងថា កាលពីចុងសប្ដាហ៍កន្លងទៅនេះ ឯកឧត្តម​ ជា វុទ្ធី អគ្គលេខាធិការ​នៃគណៈកម្មាធិការ​វិនិយោគកម្ពុជានៃក្រុមប្រឹក្សា​អភិវឌ្ឍន៍​កម្ពុជា បានចុះពិនិត្យ​វឌ្ឍនភាព​នៃការអភិវឌ្ឍតំបន់សេដ្ឋកិច្ចពិសេស​មួយចំនួននៅក្នុងខេត្តស្វាយរៀង​ ក្នុងគោលបំណង​ក្ដាប់យកព័ត៌មាន​វឌ្ឍនភាព​ និងបញ្ហា​ប្រឈម​ផ្សេងៗរបស់វិស័យឯកជន ។

សេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា​បានបញ្ជាក់ថា តំបន់សេដ្ឋកិច្ចពិសេស​មួយចំនួន​នៅក្នុង​ខេត្តស្វាយរៀង កំពុងមានភាពមមាញឹក​ក្នុងការអភិវឌ្ឍហេដ្ឋារចនាសម្ព័ន្ធ និងការសាងសង់​រោងចក្រ​ដែលនឹងចាប់ដំណើរការ​នៅក្នុងពេល​ឆាប់ៗខាងមុខនេះ ហើយមានតម្រូវការ​កម្មករ​ និយោជិត​រាប់ពាន់​កន្លែងសម្រាប់ជូនបងប្អូនកម្មករ ជាពិសេស​ចំពោះពលករដែលទើប​ត្រលប់មកពីប្រទេសថៃ ។​ មួយគ្នានោះ​ នៅក្នុង​តំបន់សេដ្ឋកិច្ចពិសេសថ្មីៗ​មួយចំនួន​ ដូចជា​ក្នុង​តំបន់​សេដ្ឋកិច្ចពិសេស​ ហ័រស៊ាង​ អ៊ីធើណេសិនណល់​ មានសហគ្រាសវិនិយោគខ្លះកំពុងធ្វើការផលិតនូវផលិតផលពាក់កណ្តាលសម្រេច​ និងនាំចេញទៅប្រទេសចិនវិញ​ ដើម្បីផលិតជាផលិតផលសម្រេច​ ដែលនេះក៏ជា​សញ្ញាណ​ថ្មីមួយបន្ថែមទៀតសម្រាប់វិស័យឧ​ស្សា​​ហកម្មនៅកម្ពុជា ។

យោងតាមរបាយការណ៍របស់ក្រុម​ប្រឹក្សាអភិវឌ្ឍន៍កម្ពុជា​ បានបង្ហាញឱ្យដឹងផងដែរថា មានគម្រោង​វិនិយោគ​ធំៗ​ជាច្រើ​ន​បាន​បោះទីតាំង​នៅក្នុងតំបន់សេដ្ឋកិច្ចពិសេស​​នានា​ក្នុង​ខេត្តស្វាយរៀង ដូចជា​គម្រោង​រោងចក្រផលិត​​​សំបក​កង់ឡាន​ដែលមានតម្លៃទុនវិនិយោគរាប់សិបលានដុល្លារអាម៉េរិក រោងចក្រ​ដំឡើង​កង់​ដើម្បីនាំចេ​ញ​ទៅកាន់ទីផ្សារអន្តរជាតិ និង​រោងចក្រសហគ្រាស​ជាច្រើន​ទៀត​ ធ្វើ​ឱ្យ​កំណើន​នៃកា​រសាងសង់​រោងចក្រនៅខេត្តស្វាយរៀង​មានសកម្មភាពមមាញឹក ជាពិសេស​នៅក្រុង​បាវិតជាប់​ព្រំដែនកម្ពុជា​-​វៀតណាម ។

​លោក ពុត ចន្តារិទ្ធអគ្គលេខាធិការសមាគមឧស្សាហកម្មស៊ីម៉ងត៍កម្ពុជា​ បានមានប្រសាសន៍ប្រាប់សារព័ត៌មាន​ AMS Economy នាពេលកន្លងមកនេះថា ក្នុងរយៈពេលប៉ុន្មានឆ្នាំចុងក្រោយ​នេះ បណ្ដាតំបន់នៅតាមព្រំដែន​ ក្នុងនោះមានក្រុងបាវិត​ ខេត្ត​ស្វាយរៀង​ ឃើញថា មានតម្រូវការ​នៃការសាងសង់សំណង់ធំៗកើនឡើង​ខ្ពស់ ដែលធ្វើឱ្យ​កា​រផ្គត់ផ្គង់ស៊ី​ម៉ង់ត៍ទៅកាន់​តំបន់​នោះមានកំណើន​ខ្ពស់ ខណៈដែលការផលិតស៊ីម៉ងត៍នៅក្នុងស្រុកអាចឆ្លើយតបទៅនឹងតម្រូវការបានគ្រប់គ្រាន់ ៕