សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អ្នកជំនាញនៅក្នុងវិស័យសេដ្ឋកិច្ច និងពាណិជ្ជកម្មក្នុងស្រុកបានលើកឡើងស្រដៀងគ្នាថា នៅពេលបច្ចុប្បន្ននេះ សិប្បកម្ម ក៏ដូចជារោងចក្រកែច្នៃផលិតផលក្នុងស្រុកមួយចំនួនចាប់ផ្តើមពង្រឹងលទ្ធភាពផលិតរបស់ខ្លួនឱ្យកាន់តែល្អ និងមានគុណភាពប្រសើរជាងមុន ដើម្បីអាចធ្វើការប្រកួតប្រជែងនៅលើទីផ្សារសេរី។
លោកឧកញ៉ា តែ តាំងប៉ ប្រធានសមាគមសហគ្រាសធនតូច និងមធ្យមកម្ពុជា (FASMEC) បានលើកឡើងនៅក្នុងវេទិកាពិភាក្សាស្តីពី «ស្ថានភាពសេដ្ឋកិច្ច និងអចលនទ្រព្យឆ្នាំ២០២៤» កាលពីពេលថ្មីៗនេះថា ផលិតផលខ្មែរនាពេលបច្ចុប្បន្ននេះកាន់តែមានគុណភាពល្អមិនចាញ់ប្រទេសជិតខាងនោះទេ ខណៈប្រភេទទំនិញក៏មានច្រើនសម្បូរបែបសម្រាប់បម្រើសេចក្តីត្រូវការរបស់ប្រជាពលរដ្ឋ។
លោកឧកញ៉ា បានបន្ថែមឱ្យដឹងផងដែរថា ក្នុងទិវាសហគ្រាសធុនតូច និងមធ្យម (SEM Day) ដែលនឹងរៀបចំនាពេលខាងមុខនេះ នឹងមានការតាំងបង្ហាញផលិតផលខ្មែរប្រមាណ ៥០០មុខ ដែលនេះជាការបង្ហាញឱ្យឃើញថា ផលិតរបស់កម្ពុជាកាន់តែប្រសើរឡើង មានគុណភាពល្អ មិនចាញ់ប្រទេសជិតខាងនោះទេ ខណៈប្រភេទទំនិញ ក៏មានសម្បូរបែបសម្រាប់បម្រើសេចក្តីត្រូវការទីផ្សារក្នុងស្រុក។ ប៉ុន្តែយ៉ាងនេះក្តី ទោះជាទីផ្សារផលិតផលកម្ពុជាកាន់តែប្រសើរឡើង លោកក៏បានអំពាវនាវឱ្យប្រជាពលរដ្ឋកម្ពុជាទាំងអស់ រួមគ្នាគាំទ្រផលិតផលក្នុងស្រុក រួមគ្នាធ្វើទីផ្សារ និងផ្សព្វផ្សាយទៅក្រៅប្រទេស ដើម្បីជំរុញការនាំចេញឱ្យបានកាន់តែច្រើន។
ក្នុងពេលជាមួយគ្នានេះ លោកឧកញ៉ា តែ តាំងប៉ ក៏បានឱ្យដឹងដែរថា បច្ចុប្បន្នសហគ្រាសធុនតូច និងមធ្យមនៅកម្ពុជា បានកើនឡើងដល់ប្រមាណ ៧០ម៉ឺនសហគ្រាស ក្នុងនោះជាង ៤ម៉ឺនសហគ្រាសបានចុះបញ្ជីជាមួយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដោយផលិតផលរបស់សហគ្រាសមួយចំនួនមានដាក់លក់នៅក្នុងម៉ាត និងផ្សារទំនើប។
ទាក់ទងនឹងវិស័យសហគ្រាសខ្នាតតូច និងមធ្យម (SME) នេះ លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា បានឱ្យដឹងថា បញ្ហាប្រឈមដែល SME កម្ពុជា ជួបប្រទះនាពេលបច្ចុប្បន្ននេះ គឺការចំណាយថ្លៃដើមខ្ពស់ ដែលជាឧបសគ្គធ្វើឱ្យពិបាកប្រកួតប្រជែងទីផ្សារ ជាពិសេសជាមួយប្រទេសជិតខាង។
លោកបណ្ឌិត បានលើកឡើងបន្ថែមថា បើធៀបជាមួយនឹងប្រទេសផ្សេងៗ ថ្លៃដើមអគ្គិសនីនៅកម្ពុជានៅតែខ្ពស់ទោះបីមិនរួមចំណែកទៅក្នុងថ្លៃដើមច្រើនក៏ដោយ ហើយវត្ថុធាតុដើមមួយចំនួន គឺនាំចូលពីក្រៅប្រទេស និងរៀនពីបច្ចេកទេសផលិតពីអ្នកជំនាញរបស់គេ ហេតុនេះហើយសហគ្រាសក្នុងស្រុកអាចប្រឈមបញ្ហាមួយចំនួនក្នុងការប្រកួតប្រជែង។
លោកបន្តថា អ្នកផលិតរបស់កម្ពុជា ភាគច្រើនហាក់មិនបានស្វែងយល់ច្រើនទាក់ទងនឹងប្រភេទនៃសារធាតុគីមីឱ្យបានច្បាស់ថា ប្រភេទណាអាចប្រើប្រាស់បាន និងមានកម្រិតនៃផលប៉ះពាល់កម្រិតណា ដោយភាគច្រើនអនុវត្តបច្ចេកទេសបន្តពីអ្នកជំនាញមកពីប្រទេសជិតខាង។ សម្រាប់ករណីនេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ មានតួនាទីសំខាន់ណាស់ក្នុងការបណ្តុះបណ្តាលបច្ចេកទេសដល់ផលិតករ និងម្ចាស់សហគ្រាសនៅកម្ពុជា ដើម្បីបង្កើនជំនាញផលិតរបស់ពួកគេ៕
Account
Security
Favourite Content