សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេល២០ឆ្នាំកន្លងមកនេះ វិស័យអចលនទ្រព្យបានជួបព្យុះភ្លៀង និងភាពរីកចម្រើនទៅតាមការប្រែប្រួលនៃស្ថានភាពសេដ្ឋកិច្ចកម្ពុជា ក៏ដូចជាពិភពលោក ដែលធ្វើឱ្យសកម្មភាពនៃការទិញលក់ និងតម្លៃអចលនទ្រព្យក៏មានការផ្លាស់ប្តូរទៅតាមនោះផងដែរ ។
អ្នកស្រី អាន សុធីតា នាយិកាប្រតិបត្តិក្រុមហ៊ុនអចលនទ្រព្យ PropNex Cambodia បានមានប្រសាសន៍ថា ក្នុងរយៈពេល២០ឆ្នាំចុងក្រោយនេះ វិស័យអចលនទ្រព្យនៅកម្ពុជាបានឆ្លងកាត់ការផ្លាស់ប្តូរ និងរីកចម្រើនគួរឱ្យកត់សម្គាល់ ដោយក្នុងនោះគិតចាប់ពីឆ្នាំ២០០៥ ដល់ឆ្នាំ ២០០៧ គឺជាឆ្នាំដែលវិស័យនេះមានការរីកចម្រើនទៅលើការបង្កើតតំបន់សេដ្ឋកិច្ច ហើយវិនិយោគិនក្នុង និងក្រៅប្រទេសក៏បានចូលមកបណ្ដាក់ទុនជាបន្តបន្ទាប់បង្កើតរោងចក្រ ។ ក្នុងដំណាក់កាលនោះ រាជរដ្ឋាភិបាលក៏បានកែប្រែ និងបង្កើតលក្ខន្តិកៈមួយចំនួនដើម្បីទាក់ទងវិនិយោគិនបរទេសចូលមកបន្ថែមទៀត ។
អ្នកស្រីបន្តថា នៅក្នុងឆ្នាំ២០០៨ កម្ពុជា ក៏ដូចជាពិភពលោកបានជួបនូវវិបត្តិហិរញ្ញវត្ថុសកល ដែលជាពេលវេលាធ្វើឱ្យធ្លាក់ចុះប្រតិបត្តិការទិញលក់ និងការធា្លក់ចុះនៃតម្លៃអចលនទ្រព្យក៏ដូចជាការថយចុះនូវរំហូរវិនិយោគិនបរទេសចូលមកកម្ពុជា ។ ក្នុងអំឡុងពេលនោះដែរ កម្ពជាក៏បានបាត់បង់ចំនួនភ្ញៀវទេសចរបរទេសមួយចំនួនផងដែរ ដោយសារតែបញ្ហាសេដ្ឋកិច្ចពិភពលោក ។ នៅក្នុងឆ្នាំ២០១០ ជាពេលវេលាដែលវិស័យអចលនទ្រព្យនៅក្នុងប្រទេសកម្ពុជាចាប់ផ្ដើមមានការរីកចម្រើនបន្តិចឡើងវិញក្រោយផលប៉ះពាល់នៃវិបត្តិសេដ្ឋកិច្ចសកល ។
អ្នកស្រីបន្ថែមថា នៅអំឡុងពេលនោះដែរ វិស័យសំណង់ក៏ចាប់ផ្ដើមមានសកម្មភាពកម្រើកឡើងវិញ ការទិញលក់ចាប់ផ្ដើមកើតមានឡើងជាហូរហែ រហូតដល់ឆ្នាំ២០១២ ក្រោយពេលរដ្ឋាភិបាលចេញច្បាប់មួយដែលអនុញ្ញាតឱ្យជនបរទេសអាចកាន់កាប់អគារសហកម្មសិទ្ធិចាប់ពីជាន់ទី១ឡើងទៅ មានវិនិយោគិនបរទេសជាច្រើនចូលមកកម្ពុជា វិនិយោគលើអគារសហកម្មសិទ្ធិ ខុនដូ និងអាផាតមិនជាដើម។ នៅឆ្នាំ២០១៧ ជាឆ្នាំមួយដែលវិស័យអចលនទ្រព្យចាប់ផ្ដើមឡើងដល់ចំណុចកំពូល ដោយវិនិយោគិនបរទេស ជាពិសេសចិនសម្រុកទៅកាន់ខេត្តព្រះសីហនុស្វែងរកការវិនិយោគបន្ទាប់ពីរាជរដ្ឋាភិបាលបានបោះទុនអភិវឌ្ឍន៍លើហេដ្ឋារចនាសម្ព័ន្ធយ៉ាងច្រើននៅក្នុងក្រុងព្រះសីហនុ ។ រហូតដល់ឆ្នាំ២០១៩ វិស័យនេះក៏នៅតែមានស្ថានភាពល្អប្រសើរ ហើយរហូតដល់ឆ្នាំ២០២០ក៏ចាប់ផ្ដើមមានបញ្ហាក្រោយការចាកចេញរបស់ជនជាតិចិនមួយភាគធំ ជាពិសេសវិបត្តិនៃជំងឺកូវីដ១៩ចូលមកយាយី ។
យ៉ាងណាក៏ដោយ គិតត្រឹមដំណាច់ឆ្នាំ២០២៣ អគារពាណិជ្ជកម្ម និងអគារលំនៅឋានដែលបានដាក់ឱ្យប្រើប្រាស់សរុបមានចំនួន៤៦៦នៅក្នុងរាជធានីភ្នំពេញ ក្នុងនោះគម្រោងខុនដូសរុបមានចំនួន១៣១គម្រោង ស្មើនឹងប្រមាណ ៧ម៉ឺនយូនីត គម្រោងអាផាតមិន មានចំនួន១៧៧គម្រោង ស្មើនឹងប្រមាណ ១ម៉ឺនយូនីត គម្រោងអគារការិយាល័យមានចំនួន ៨៤គម្រោង និងគម្រោងទីផ្សារលក់រាយមានចំនួន ៧១គម្រោង ៕
Account
Security
Favourite Content