ភ្នំពេញ ៖ ឯកអគ្គរដ្ឋទូតចិនដែលទើបតែងតាំងថ្មីប្រចាំនៅកម្ពុជា ឯកឧត្តម វ៉ាង វិនប៊ិន (Wang Wenbin) កំពុងជួយផ្សព្វផ្សាយពីវិស័យទេសចរណ៍កម្ពុជាទៅកាន់ពិភពលោក ​ជាក់ស្ដែង កាលពីពេលកន្លងទៅថ្មីៗនេះ តាមរយៈគណនីទំនាក់ទំនងអេឡិចត្រូនិកផ្លូវការរបស់លោកផ្ទាល់បានសរសេរថា «ប្រទេសកម្ពុជា ជាគោលដៅដ៏ល្អឥតខ្ចោះ ដើម្បីទស្សនាប្រាសាទបុរាណ វប្បធម៌រស់រវើក និងធម្មជាតិស្រស់បំព្រងដ៏ទាក់ទាញ»។

ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនថ្មីប្រចាំកម្ពុជាកាលពីថ្ងៃទី៥ ខែកក្កដា បានមកដល់រាជធានីភ្នំពេញ ដើម្បីចាប់ផ្តើមអាណត្តិការទូតនៅព្រះរាជាណាចក្រកម្ពុជា និងបានថ្លែងប្រាប់អ្នកសារព័ត៌មានយ៉ាងខ្លីនៅអាកាសយានដ្ឋានអន្តរជាតិភ្នំពេញដោយបញ្ជាក់​ថា ៖ ការ​ក្លាយ​ជា​ឯកអគ្គរដ្ឋទូត​ចិន​ប្រចាំ​ប្រទេស​កម្ពុជា​ទី១៨ គឺ​មាន​ទាំង​កិត្តិយស និង​ការ​ទទួល​ខុស​ត្រូវ។

​ការ​ចេញផ្សាយ​ជា​ផ្លូវការ​របស់​​​ក្រសួង​ព័ត៌មាន​​បាន​កត់​សម្គាល់​ថា​ គឺជា​ជំហាន​វិជ្ជមាន​មួយ​របស់​ឯកឧត្តមឯកអគ្គ​រដ្ឋទូត​ក្នុង​ការ​ផ្សព្វផ្សាយ​វិ​ស័​យ​ទេសចរណ៍​របស់​កម្ពុជា​ទៅកាន់​ពិភពលោក​។​​ ភាតរភាពនៃប្រទេសទាំងពីរ​​បាន​ចាក់ឫស​យ៉ាង​ជ្រៅ​នៅ​ក្នុង​ដួងចិត្ត​របស់​ប្រជាជន​ទាំងពីរ​ ​ហើយ​មិត្តភាព​ដែកថែប​ធ្វើជា​គំរូ​សម្រាប់​ប្រទេស​ដទៃទៀត។

​

ប្រទេស​ចិន​ ​និង​កម្ពុជា ​រីករាយ​ចំពោះ​ចំណងមិត្តភាព​ប្រពៃណី​ដ៏​ជ្រាលជ្រៅ​ ​ហើយ​បាន​រំលឹក​ដល់​ប្រធានាធិបតី​ចិន​ ​លោក​ ​ស៊ី​ ​ជី​ន​ពីង​ ​ដែល​បាន​លើកឡើង​ថា​ ​ចំណងមិត្តភាព​របស់​កម្ពុជា​-​ចិន​ ​ប្រៀប​បីដូច​ជាដើម​ឈើមួយដើម​ដ៏​ធំ​​ដែល​បាន​ចាក់ឫស​យ៉ាង​ជ្រៅ ​និង​យ៉ាង​រឹង​មាំ​។ ស្រដៀងគ្នានេះ កាលពីពេលកន្លងទៅ ព្រះបរមរតនកោដ្ឋ សម្តេចព្រះនរោត្តម សីហនុ ក៏ធ្លាប់បានប្រៀបធៀប មិត្តភាព​រវាងប្រទេស​ទាំងពីរ​ទៅ​នឹង​ផ្កា​ដែល​មិន​ចេះ​រុះរោយ​។​

​ឯកអគ្គរាជទូតថ្មីរូបនេះបានបញ្ជាក់ពីការត្រៀមខ្លួន ដើម្បីធ្វើការយ៉ាងជិតស្និទ្ធជាមួយមិត្តកម្ពុជាទាំងអស់ ដើម្បីកាន់ដំបង និងបន្តនូវប្រពៃណីដ៏មានមោទនភាពនៃមិត្តភាពចិន-កម្ពុជា ព្រមទាំងបានសន្យាថា នឹងអនុវត្តដោយឥតងាករេនូវមតិឯកភាពសំខាន់ៗដែលមេដឹកនាំនៃប្រទេសទាំងពីរសម្រេចបាន ខិតខំប្រឹងប្រែងឥតឈប់ឈរ ដើម្បីពង្រឹងចំណងមិត្តភាពដ៏រឹងមាំ និងជំរុញសហគមន៍ចិន-កម្ពុជា ជាមួយនឹងអនាគតរួមគ្នាក្នុងយុគសម័យថ្មី ដើម្បីផ្តល់ភាពជាក់ស្តែងបន្ថែមទៀតសម្រាប់ប្រជាជននៃប្រទេសទាំងពីរ។

ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បាននិយាយកាលពីពេលថ្មីៗនេះថា នៅឆ្នាំ២០២៤ ប្រទេសចិនជាប់ចំណាត់ថ្នាក់លេខ៣ ក្នុងចំណោមបណ្តាប្រទេសដែលមានចំនួនភ្ញៀវទេសចរមកទស្សនាកម្ពុជាច្រើនជាងគេ។

ឯកឧត្តម រដ្ឋមន្ត្រី​បាន​គូសបញ្ជាក់​ថា​ ៖ កំណើន​ទេសចរណ៍​ចិន ​គឺជា​ឱកាស​ដ៏​សំខាន់​មួយ​ដែល​មិន​ត្រឹមតែ​ជំរុញ​ការអភិវឌ្ឍន៍​ទេសចរណ៍​កម្ពុជា​ប៉ុណ្ណោះ​ទេ ប៉ុន្តែ​ថែមទាំង​បង្កើត​ឱកាស​វិនិយោគ​ក្នុង​វិស័យ​ផ្សេងៗ​ទៀត​។

គួរបញ្ជាក់ថា វិស័យទេសចរណ៍ គឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចរបស់ប្រទេសកម្ពុជា បន្ថែមលើការនាំចេញសម្លៀកបំពាក់ ស្បែកជើង និងទំនិញធ្វើដំណើរ កសិកម្ម សំណង់ និងអចលនទ្រព្យ។

សូមជ្រាបថា គោលដៅទេសចរណ៍ចំនួន ៤ របស់ប្រទេសកម្ពុជាត្រូវបានចុះបញ្ជីក្នុងចំណោមតំបន់ទេសចរណ៍កំពូលទាំង២៥ របស់អាស៊ីនាពេលថ្មីៗនេះ នៅក្នុងកម្មវិធីពានរង្វាន់ចុងក្រោយបំផុតដោយ Tripadvisor ។ ក្រៅពីប្រាសាទបុរាណ ព្រះរាជាណាចក្រមានឆ្នេរសមុទ្រប្រវែង ៤៥០ គីឡូម៉ែត្រ ដែលលាតសន្ធឹងលើខេត្តភាគនិរតីចំនួន ៤ រួមមាន ខេត្តព្រះសីហនុ កំពត កែប និងខេត្តកោះកុង។

ប្រាសាទអង្គរវត្តនៃខេត្តសៀមរាបទទួលបានចំណាត់ថ្នាក់លេខ២ ហើយប្រាសាទតាព្រហ្ម និងប្រាសាទបាយ័ននៃខេត្តបានជាប់ចំណាត់ថ្នាក់ទី១៩ និងទី២០រៀងគ្នា ខណៈសារមន្ទីរប្រល័យពូជសាសន៍ទួលស្លែងរាជធានីភ្នំពេញទទួលបានចំណាត់ថ្នាក់ទី២២។

សូមជម្រាបថា ប្រទេសកម្ពុជាបានទាក់ទាញភ្ញៀវទេសចរអន្តរជាតិប្រមាណ ២,៦ លាននាក់ក្នុងរយៈពេលប្រាំ​មួយ​ខែនៃឆ្នាំ២០២៤ កើនឡើង ២២ភាគរយបើធៀបនឹងរយៈពេលដូចគ្នាកាលពីឆ្នាំមុន ដែលក្នុងនោះមាន ៣២៦ ០០៣ នាក់ជាជនជាតិចិន៕