សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជា-ជប៉ុន បានចុះហត្ថលេខាលើលិខិតប្តូរសារស្តីពីការផ្តល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់ចំនួន ១ ០០២ លានយ៉េន (ប្រមាណ ៧,២ លានដុល្លារអាមេរិក) សម្រាប់អនុវត្តគម្រោង «កម្មវិធីអភិវឌ្ឍន៍សេដ្ឋកិច្ច និងសង្គម» (គម្រោងលើវិស័យនគរូបនីយកម្ម) នៅថ្ងៃទី២៦ ខែធ្នូ ឆ្នាំ២០២៤ នៅទីស្តីការក្រសួងការបរទេស។
ឯកឧត្តម ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក UENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំនៅកម្ពុជា បានចុះហត្ថលេខាលើលិខិតប្តូរសារ និងឯកសារពាក់ព័ន្ធស្តីពីការផ្តល់ហិរញ្ញប្បទានឥតសំណងរបស់ជប៉ុន។
លោកឯកអគ្គរាជទូតបានថ្លែងថា៖ រាជរដ្ឋាភិបាលកម្ពុជាកំពុងផ្តល់អាទិភាពដល់ការចុះបញ្ជីដីធ្លី និងការធ្វើផែនការទីក្រុង ដើម្បីដោះស្រាយវិវាទដីធ្លី និងលើកកម្ពស់ការអភិវឌ្ឍន៍ និងកំណើនទីក្រុង/តំបន់សមស្រប។ ឆ្លើយតបទៅនឹងសំណើរបស់រាជរដ្ឋាភិបាលកម្ពុជា រដ្ឋាភិបាលជប៉ុនបានសម្រេចផ្តល់ថវិកា និងផ្គត់ផ្គង់រូបភាពផ្កាយរណប ផែនទីស្បែក ទិន្នន័យផែនការទីក្រុង3D រួមជាមួយថ្នាលទិន្នន័យភូមិសាស្ត្រ ដើម្បីគាំទ្រការឆ្លើយតបចំពោះបញ្ហាប្រឈមទាំងនេះ។ គម្រោងនេះនឹងរួមបញ្ចូលការពង្រឹង”ការអភិវឌ្ឍន៍ហេដ្ឋារចនាសម្ព័ន្ធសង្គម” ដែលក្នុងនោះមានកិច្ចសហប្រតិបត្តិការឌីជីថល។
ឯកឧត្តមឯកអគ្គរាជទូត បានបញ្ជាក់ថា៖ គម្រោងនេះមានគោលបំណងគ្រប់គ្រងទិន្នន័យដូចជារូបភាពផ្កាយរណប និងផែនទីស្បែក ដែលផ្តល់ដោយរដ្ឋាភិបាលជប៉ុនប្រើថ្នាលទិន្នន័យភូមិសាស្ត្រ ។ ទិន្នន័យនេះនឹងមាននៅក្រសួងរៀបចំដែនដី នគរូបនីយកម្ម និងសំណង់ ហើយក៏អាចចែករំលែកជាមួយក្រសួងផ្សេងទៀតដែលប្រើប្រាស់ផែនទី ដូចជា ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទជាដើម។
ឯកឧត្តមមានជំនឿថា៖ ផ្កាយរណប និងបច្ចេកវិទ្យាឌីជីថលរបស់ប្រទេសជប៉ុន នឹងក្លាយជាជំនួយដ៏ល្អក្នុងការដោះស្រាយជម្លោះដីធ្លី និងពង្រឹងការគ្រប់គ្រងដីធ្លី និងហេដ្ឋារចនាសម្ព័ន្ធនៅកម្ពុជាបន្ថែមទៀត៕
Account
Security
Favourite Content