ភ្នំពេញ៖ ថ្មីៗនេះ សហគមន៍កសិកម្មស្រ្តីសាមគ្គីពានីរុងរឿង កាលពីពេលកន្លងទៅថ្មីៗនេះ បានចុះហត្ថលេខាលើកិច្ចព្រមព្រៀងទទួលហិ​រញ្ញ​​ប្បទានឥតសំណង នៃគម្រោងពិពិធកម្មកសិកម្មកម្ពុជា (CASDP) ដែលបំពេញបន្ថែមទុនវិនិយោគ ៤0% នៃផែនការវិនិយោគលើការធ្វើពិពិធកម្មនៃមុខរបរចិញ្ចឹមជ្រូកជាសហគមន៍ ។

កិច្ចព្រមព្រៀង ផ្តល់ហិរញ្ញប្បទានឥតសំណងដល់សហគមន៍កសិកម្ម«ស្រ្តីសាមគ្គីពានីរុងរឿង» បានធ្វើឡើងនៅឃុំពានី ស្រុកកំពង់ត្រឡាច ខេត្តកំពង់ឆ្នាំង ដោយសហគមន៍ទទួលបានថវិកាជំនួយឥតសំណងចំនួន ៣៥០០០ដុល្លារ ពីគម្រោងពិពិធកម្មកសិកម្មកម្ពុជា(CASDP) ស្មើនឹង៤០%នៃផែនការវិនិយោគលើការធ្វើពិពិធកម្មមុខរបរចិញ្ចឹមជ្រូកជាសហគមន៍ ខណៈដែលសហគមន៍វិនិយោគបង្គ្រប់ដោយខ្លួនឯងផ្ទាល់៦០%ទៀត។

ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កិច្ចព្រមព្រៀងនេះ ផ្តោតលើការកែលម្អខ្សែសង្វាក់ផលិតកម្មចិញ្ចឹមជ្រូករបស់សហគមន៍កសិកម្មសម្រាប់ការនាំចេញទៅកាន់ទីផ្សារ សំដៅជំរុញកំណើនសេដ្ឋកិច្ចសហគមន៍ និងមូលដ្ឋាន។

សូមជ្រាបថា ការចិញ្ចឹមជ្រូកជាលក្ខណៈគ្រួសារមានភាពងាយរងគ្រោះខ្ពស់ចំពោះតម្លៃទីផ្សារទាប ដោយសារការប្រកួតប្រជែងពីជ្រូកនាំចូល និងកសិដ្ឋានឯកជនធំៗ ជាពិសេសពូជដែលផលិតដោយកសិករ បានចំណាយដើមទុនច្រើន និងខ្វះផែនការវិនិយោគ ខ្វះធាតុចូលផលិតកម្មខ្ពស់។

ឯកឧត្តម ឃឹម ហ្វីណង់ បានលើកឡើងដែរថា កិច្ចព្រមព្រៀងថ្ងៃនេះ បានធ្វើឡើងឆ្លើយតបទៅនឹងបញ្ហាប្រ​ឈមដែលកសិករជាសមាជិកសហគមន៍កំពុងជួបប្រទះ ដូចជាតម្លៃផលិតកម្មខ្ពស់ តម្លៃជ្រូករស់ទាបដែលកំណត់ដោយឈ្មួញកណ្តាល ការប្រកួតប្រជែងជាមួយផលិតផលនាំចូល និងកង្វះធនធានដើម្បីពង្រីកផលិតកម្ម។ ទាំងនេះ ជាដើមចមធ្វើឱ្យសហគមន៍កសិកម្មមិនអាចសម្រេចបាននូវផលិតកម្មដែលមានស្ថិរភាព និងប្រកួតប្រជែងជាមួយទីផ្សារធំៗបាន។

ឯកឧត្តម ឃឹម ហ្វីណង់ បានឱ្យដឹងថា សហគមន៍កសិកម្ម «ស្រ្តីសាមគ្គីពានីរុងរឿង» មួយនេះមិនទាន់ជាសហគមន៍កសិកម្មទំនើបនៅឡើយទេ តែទទួលបានការគាំទ្រ និងមានសក្តានុពល។

ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម បានបញ្ជាក់បន្ថែមថា សហគមន៍គ្រោងនឹងបោះទុនវិនិយោគរួមគ្នាជាមួយសមាជិករបស់ខ្លួនលើប្រតិបត្តិការ និងការធ្វើផលិតកម្មជ្រូកប្រមាណ ១១ម៉ឺនដុល្លារ ដោយដើរតួនាទីជាអ្នកផ្គត់ផ្គង់ពូជកូនជ្រូក ចំណីជ្រូកសម្រាប់សមាជិកសហគមន៍ រួមទាំងផ្គត់ផ្គង់សាច់ជ្រូកទៅកាន់ទីផ្សារ។ ក្នុងការប្រតិបត្តិ សហគមន៍នឹងដើរតួនាទីផ្គត់ផ្គង់ពូជកូនជ្រូក និងចំណីជ្រូកដល់សមាជិក ដោយមានមេជ្រូកពូជ២០ក្បាល កូន៣០០ក្បាល ក្នុងមួយឆ្នាំ និងចំណី ៣០០តោនក្នុងមួយឆ្នាំ ដើម្បីយកទៅចិញ្ចឹមបន្តរៀងៗខ្លួន និងផ្គត់ផ្គង់ជ្រូកសាច់ទៅកាន់ទីផ្សារក្នុងបរិមាណប្រហែល ៥០តោនក្នុងមួយឆ្នាំ។

ឯកឧត្តម ឃឹម ហ្វីណង់ថ្លែងថា៖

«ក្នុងតួនាទីខ្ញុំជានាយកគម្រោងថ្មីនៃក្រសួងកសិកម្ម ពិតជាសប្បាយចិត្តដែលបានឃើញ​បងប្អូនកសិករយើងចាប់ផ្តើមធ្វើការរួមគ្នាដោយទំនុកចិត្តនិងភាពជឿជាក់ខ្ពស់តាមរយៈការដាក់ទុនវិនិយោគរួមគ្នា ហើយក៏សង្ឃឹមថាសហគមន៍ដ៏មានសក្តានុពលមួយនេះនឹងពិចារណាបង្កើនសមាហរណកម្មរបស់ខ្លួនបន្ថែមទៀត ជាពិសេសការធ្វើផលិតកម្មកសិកម្មតាមកិច្ចសន្យា ដើម្បីប្រែក្លាយខ្លួនទៅសហគមន៍កសិកម្មទំនើបពេញលក្ខណៈសម្បត្តិតែម្តងក្នុងថ្ងៃណាមួយ»។

សូមជ្រាបថា កិច្ចព្រមព្រៀងនេះត្រូវបានចុះហត្ថលេខារវាងឯកឧត្តម ឃឹម ហ្វីណង់ អនុរដ្ឋលេខាធិការ និងជានាយកគម្រោង CASDP/MAFF ជាមួយ លោក បាន ធី ប្រធានក្រុមប្រឹក្សាភិបាលសហគមន៍កសិកម្មស្រ្តីសាមគ្គីពានីរុងរឿង ដោយមានការអញ្ជើញចូលរួមធ្វើជាសាក្សីពីប្រធានគម្រោង CASDP តំណាងក្រសួងកសិកម្ម ក្រសួងសេដ្ឋកិច្ច ក្រសួងធនធានទឹក និងក្រសួងអភិវឌ្ឍន៍ជនបទ (MRD) មន្ត្រីនៃអង្គភាពអនុវត្តគម្រោង សមាជិកសហគមន៍កសិកម្ម និងអាជ្ញាធរមូលដ្ឋាន៕