សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងដំណើរទស្សនកិច្ចរបស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ទៅកាន់ប្រទេសជប៉ុន បានជួបពិភាក្សាការងារជាមួយអភិបាលខេត្តអៃឈិ នៃប្រទេសជប៉ុន អំពីការបង្កើតកិច្ចសហប្រតិបត្តិការលើវិស័យទេសចរណ៍ថ្មីៗបន្ថែមទៀតរវាងកម្ពុជា និងខេត្តអៃឈិប្រទេសជប៉ុន ជាពិសេសជំរុញឱ្យមានការតភ្ជាប់ជើងហោះហើរត្រង់រវាងបណ្តាខេត្ត ក្រុងរបស់ជប៉ុនផ្សេងទៀតជាមួយកម្ពុជា ។
នៅក្នុងកិច្ចជំនួបពិភាក្សានេះ ភាគីទាំងពីរបានបង្ហាញទស្សនរួមគ្នាថា ទាំងប្រទេសកម្ពុជាដែលជាតារាទើបនឹងរះពោរពេញដោយកាលានុវត្ត និងខេត្តអៃឈិប្រទេសជប៉ុន ដែលមានសេដ្ឋកិច្ចនាំមុខគេមួយដែរនៅក្នុងប្រទេសជប៉ុន មានសក្ដានុពលទេសចរណ៍ និងបេតិកភណ្ឌពិភពលោកដូចគ្នា ក៏ដូចជាប្រពៃណីទំនៀមទម្លាប់គួរឱ្យចាប់អារម្មណ៍ ជាពិសេស ទំនាក់ទំនាក់ទំនងការទូតរវាងកម្ពុជា និងជប៉ុន ជាង៧២ឆ្នាំមកហើយនោះ ត្រូវបានដំឡើងកម្រិតជាដៃគូយុទ្ធសាស្ត្រគ្រប់ជ្រុងជ្រោយ គឺពិតជាកត្តាជួយបំពេញបន្ថែមគ្នាទៅវិញទៅមក ដើម្បីរួមគ្នាជំរុញវិស័យទេសចរណ៍រវាងប្រទេសទាំងពីរ គឺកម្ពុជា និងជប៉ុន ។
នៅក្នុងជំនួបនោះដែរ ភាគីទាំងពីរ បានប្ដេជ្ញាក្នុងការរួមគ្នាផ្សព្វផ្សាយសក្ដានុពលទេសចរណ៍ដល់ប្រជាជននៃប្រទេសទាំងពីរ ការពិនិត្យលទ្ធភាពរៀបចំព្រឹត្តិការណ៍ជំរុញទេសចរណ៍ ការជំរុញជើងហោះហើរត្រង់ ដើម្បីឱ្យមានកំណើនទេសចរកើនឡើងជាលំដាប់ពីមួយឆ្នាំទៅមួយឆ្នាំ ។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍នៃព្រះរាជាណាចក្រកម្ពុជាបានថ្លែងថា ការធ្វើពិពិធកម្មទីផ្សារទេសចរណ៍ថ្មីបន្ថែមរវាងប្រទេសកម្ពុជា និងខេត្តអៃឈិ (Aichi Prefecture) នៃប្រទេសជប៉ុន នឹងជួយឱ្យមានកំណើនភ្ញៀវទេសចររវាងប្រទេសទាំងពីរកាន់តែកើនឡើងមួយកម្រិតទៀត ។ ជាមួយគ្នានេះ ឯកឧត្តមក៏បានស្នើឱ្យក្រុមហ៊ុនទេសចរណ៍ជប៉ុន MS Tourist Ltd. បន្តជួយ និងបង្កើនភ្ញៀវទេសចរជប៉ុនមកទស្សនាកម្ពុជាឱ្យកាន់តែច្រើនបន្ថែមទៀត ខណៈក្រុមហ៊ុនេះបានជួយក្នុងអភិវឌ្ឍវិស័យទេសចរណ៍កម្ពុជារហូតមក តាមរយៈការជួយផ្សព្វផ្សាយសក្តានុពលទេសចរណ៍កម្ពុជា និងការនាំភ្ញៀវទេសចរជប៉ុនមកទស្សនានៅកម្ពុជាក្នុងចំនួនគួរឱ្យកត់សំគាល់កន្លងមកនេះ ខណៈដែលក្នុងរយៈពេល៨ខែ ឆ្នាំ២០២៥កន្លងទៅនេះ ទេសចរជប៉ុន ដែលបានមកទស្សនា និងកម្សាន្តនៅកម្ពុជា មានចំនួន៧៣.០០០នាក់ ។
គួររម្លឹកថា ក្នុងវិស័យទេសចរណ៍កម្ពុជា ទើបតែសម្រេចបាននូវសមិទ្ធផលថ្មីមួយជាប្រវត្តិសាស្ត្រ គឺការបើកប្រតិបត្តិការអាកាសយានដ្ឋានអន្តរជាតិតេជោ នៅភាគខាងត្បូងរាជធានីភ្នំពេញ ។ តាមរយៈអាកាសយានដ្ឋានអន្តរជាតិនេះដែរ កម្ពុជារំពឹងថានឹងទទួលបានភ្ញៀវទេសចរបរទេសមកទស្សនា និងសម្រាកនៅកម្ពុជាកាន់តែច្រើន ដោយសារតែការតភ្ជាប់ជើងហោះហើរត្រង់ពីបណ្ដាប្រទេសនានាលើពិភពលោក ៕
Account
Security
Favourite Content