សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ អង្គការសន្ធិសញ្ញាអាត្លង់ទិកខាងជើង ហៅកាត់ថា ណាតូ (NATO) នៅថ្ងៃចន្ទសប្តាហ៍នេះបានចាប់ផ្តើមសមយុទ្ធយោធាប្រចាំឆ្នាំមួយរបស់ខ្លួនជាមួយនឹងក្រុមប្រទេសសម្ព័ន្ធមិត្តនៅក្នុងប្រទេសហូឡង់។ អ្វីដែលគួរឲ្យចាប់អារម្មណ៍ និងត្រូវបានយកមកចេញផ្សាយដោយកាសែត The Defense News បានឲ្យដឹងថា ក្នុងឆ្នាំនេះ សមយុទ្ធយោធាដើម្បីការពារគ្រាប់នុយក្លេអ៊ែរ ឬ nuclear-deterrence exercise ដែលមានឈ្មោះថា Steadfast Noon នឹងមានយន្តហោះចម្បាំងចំនួនដ៏ច្រើនខ្លាំងជាងកាលពីប៉ុន្មានឆ្នាំមុន។
សម្រាប់ឆ្នាំនេះ ទីតាំងធ្វើលំហាត់យោធានឹងប្រព្រឹត្តទៅនៅក្នុងតំបន់សមុទ្រខាងជើង ខណៈដែលក្រុមយន្តហោះចម្បាំងនឹងធ្វើប្រតិបត្តិការហោះហើរចេញពីមូលដ្ឋានទ័ព Volkel របស់ប្រទេសហូឡង់។សហរដ្ឋអាម៉េរិកដែលជាមេដឹកនាំរបស់ក្រុមប្រទេសណាតូបានបញ្ជូនយន្តហោះចម្បាំងប្រភេទ F-35 ចំនួន៤គ្រឿងឲ្យចូលរួមជំនួសឲ្យ F-15E Strike Eagle ដែលតែងតែមានវត្តមានជារៀងរាល់ឆ្នាំ។ F-35 ដែលជាយន្តហោះចម្បាំងទំនើបចុងក្រោយនេះគឺជាយន្តហោះចម្បាំងដែលអាចបំពាក់បានទាំងជាមួយនឹងមីស៊ីលគ្រប់ប្រភេទ ក៏ដូចជាក្បាលគ្រាប់នុយក្លេអ៊ែរផងដែរ។
ក្រុមអ្នកអង្កេតការណ៍នយោបាយបានមើលឃើញថា សមយុទ្ធយោធានេះធ្វើឡើងគឺស្ថិតនៅចំពេលដែលស្ថានភាពតានតឹងគួរឲ្យព្រួយបារម្ភរវាងមហាអំណាចនុយក្លេអ៊ែរទាំងពីរលើលោកគឺអាម៉េរិក និងរុស្ស៊ី។កាលពីខែកុម្ភៈកន្លងមកនេះ អនុរដ្ឋមន្ត្រីការបរទេសរុស្ស៊ី លោក Sergey Vershinin បានធ្វើការព្រមានអំពីហានិភ័យខ្ពស់ចំពោះមុខការប្រឈមមុខដាក់គ្នាណាមួយដោយផ្ទាល់រវាងមហាអំណាចទាំងពីរទៅលើអាវុធនុយក្លេអ៊ែរ។
យ៉ាងណាក្តី ក្រុមមន្ត្រីរបស់អង្គការណាតូបានលើកឡើងថា ការរៀបចំលំហាត់យោធា Steadfast Noon នេះ គឺជាកិច្ចការងារដែលណាតូតែងតែធ្វើឡើងជារៀងរាល់ឆ្នាំដែលបារព្វនៅចំខែតុលា ហើយគោលបំណងរបស់សមយុទ្ធគឺមិនសំដៅទៅលើគោលដៅ ឬបង្កការគំរាមកំហែងណាមួយឡើយ។
គួរឲ្យដឹងដែរថា សមយុទ្ធយោធាដែលធ្វើឡើងរយៈពេល២សប្តាហ៍នេះនឹងមានការចូលរួមពីសំណាក់ប្រទេសយ៉ាងហោចណាស់១៤ និងមានបញ្ចូលយន្តហោះចម្បាំងចូលរួមប្រមាណទៅដល់ជាង៧០គ្រឿងដែលមានទាំងយន្តហោះប្រភេទ Panavia Tornado, F-16, F-18 និង F-35 ផងដែរ៕
Account
Security
Favourite Content