បរទេស៖ យោងតាមប្រភពព័ត៌មានពី BBC រាយការណ៍ថា តំបន់ហ្គាហ្សាកំពុងប្រឈមមុខនឹងវិបត្តិមនុស្សធម៌ ដោយសារការផ្គត់ផ្គង់ត្រូវបានកាត់ផ្តាច់ដោយអ៊ីស្រាអែល ដែលជាឆ្លើយតបទៅនឹងការវាយប្រហាររបស់ក្រុមហាម៉ាស។

កាលពីថ្ងៃទី ៩ ខែតុលា អ៊ីស្រាអែលបានប្រកាសឡោមព័ទ្ធទាំងស្រុងលើតំបន់ហ្គាហ្សា ដោយនិយាយថា អគ្គិសនី អាហារ ប្រេងឥន្ធនៈ និងទឹកត្រូវបានកាត់ផ្តាច់។ មិនត្រឹមតែប៉ុណ្ណោះ រដ្ឋមន្ត្រីហេដ្ឋារចនាសម្ព័ន្ធអ៊ីស្រាអែលបានបញ្ជាឱ្យកាត់ផ្តាច់ការផ្គត់ផ្គង់ទឹកភ្លាមៗទៅកាន់តំបន់ហ្គាហ្សា។ មុនពេលមានការរឹតបន្តឹង អ្នករស់នៅតំបន់ហ្គាហ្សាបានប្រឈមមុខនឹងអសន្តិសុខស្បៀងយ៉ាងខ្លាំង និងការខ្វះខាតទឹករួចទៅហើយ។​ ចាប់តាំងពីការវាយប្រហារនៅថ្ងៃទី ៧ មក អ៊ីស្រាអែលបានបញ្ឈប់ការផ្គត់ផ្គង់ទាំងអស់រួមទាំងអាហារ ថ្នាំពេទ្យ និងប្រេងឥន្ធនៈចូលទៅក្នុងហ្គាហ្សា។

យោងតាមប្រភពពី UN News បានរាយការណ៍ថា ចំនួន​អ្នក​ស្លាប់​នៅ​ហ្គាហ្សា​ឡើង​ដល់​ ៥ ០៨៧ ​នាក់ ដោយគិតចាប់តាំងពីថ្ងៃទី ៧ ខែតុលា។ ទន្ទឹមនឹងនេះ តំបន់ហ្គាហ្សាគឺជាជម្រករបស់ប្រជាជនសរុបប្រហែល ២,៣ លាននាក់ ហើយប្រជាជន ៨០ ភាគរយកំពុងពឹងផ្អែកលើជំនួយមនុស្សធម៌ជាចម្បង។ តំបន់នេះត្រូវបានគ្រប់គ្រងដោយក្រុមសកម្មប្រយុទ្ធហាម៉ាស ប៉ុន្តែដែនអាកាស និងឆ្នេរសមុទ្រត្រូវបានគ្រប់គ្រងដោយអ៊ីស្រាអែល។ លើសពីនេះ អ៊ីស្រាអែលក៏បានដាក់ការរឹតបន្តឹងថា តើនរណា និងទំនិញអ្វីខ្លះដែលអាចឆ្លងកាត់រវាងព្រំដែនរបស់ខ្លួនបាន។

លោក Stéphane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ បាននិយាយថា បុគ្គលិកផ្នែកសុខាភិបាលរាប់ពាន់នាក់ត្រូវបានស្លាប់ និងរងរបួស ខណៈដែលមជ្ឈមណ្ឌលវេជ្ជសាស្ត្រមួយចំនួនត្រូវបានខូចខាត។ បច្ចុប្បន្ននេះ មនុស្សជាច្រើនគ្មានអគ្គិសនី និងអ៊ីនធឺណេតប្រើប្រាស់  ហើយពួកគេកំពុងខ្វះស្បៀងអាហារ និងទឹកស្អាតផងដែរ។ ប្រព័ន្ធទឹក និងបរិក្ខារអនាម័យត្រូវបានខូចខាត ដែលប៉ះពាល់ដល់មនុស្សជាង ៤ សែននាក់។

កំឡុងពេលសង្គ្រាម រោងចក្រថាមពលហ្គាហ្សាគឺជាប្រភពអគ្គិសនីតែមួយគត់ ហើយដំណើរការប្រព័ន្ធទឹកទាំងអស់ត្រូវការប្រេងឥន្ធនៈជាចាំបាច់។ តំបន់ហ្គាហ្សាត្រូវការប្រេងឥន្ធនៈយ៉ាងហោចណាស់ ១៦ សែនលីត្រ ប៉ុន្តែវាកំពុងប្រឈមនឹងកង្វះខាតប្រេងឥន្ធនៈប៉ុន្មានថ្ងៃមកហើយ ដោយមនុស្សត្រូវបង្ខំចិត្តផឹកទឹកប្រៃ និង​កខ្វក់។ បញ្ហានេះនឹងធ្វើឱ្យមានការភ័យខ្លាចពីវិបត្តិសុខភាព និងការភ័យខ្លាចថាមនុស្សអាចចាប់ផ្តើមស្លាប់ដោយសារការខ្វះជាតិទឹក។ ទន្ទឹមនឹងនេះ កម្មវិធីស្បៀងអាហារពិភពលោក WFP កំពុងចែកចាយស្បៀងអាហារដល់ប្រជាជនប៉ាឡេស្ទីនដែលត្រូវបានផ្លាស់ទីលំនៅជាង ១ សែននាក់ ហើយថាចំនួននេះនឹងកើនឡើង ៨ ដងក្នុងរយៈពេលប៉ុន្មានថ្ងៃខាងមុខទៀត។

ស្របពេលនេះដែរ ប្រជាជននៅតំបន់ហ្គាហ្សាមានការភ័យខ្លាចចំពោះស្ថានភាពបច្ចុប្បន្ន និងព្រួយបារម្ភចំពោះសុវត្ថិភាពរបស់ក្រុមគ្រួសាររបស់ពួកគេ។ ក្រសួងសុខាភិបាលប៉ាឡេស្ទីនបាននិយាយថា មន្ទីរពេទ្យកំពុងប្រឈមមុខនឹងការខ្វះខាតថ្នាំពេទ្យ គ្រឿងបរិក្ខារ និងប្រេងឥន្ធនៈ ដោយសារសកម្មភាពរបស់អ៊ីស្រាអែល។ ​ប៉ាឡេស្ទីនកំពុងអំពាវនាវឱ្យអន្តរជាតិជំរុញឱ្យអ៊ីស្រាអែលចាប់ផ្តើមដំណើរការខ្សែថាមពលឡើងវិញ ដើម្បីផ្គត់ផ្គង់តម្រូវការ និងសង្គ្រោះបន្ទាន់ក្នុងទម្រង់ជាថ្នាំពេទ្យ ប្រេងឥន្ធនៈ និងអគ្គិសនីជាដើម។

លើសពីនេះទៅទៀត អង្គការសហប្រជាជាតិ​បាន​លើកឡើងថា ​សាលារៀន​ជាច្រើនត្រូវ​បាន​ខូចខាត​យ៉ាង​ធ្ងន់ធ្ងរ រួមទាំងវិហារឥស្លាម ផ្ទះសម្បែង និងហេដ្ឋារចនាសម្ព័ន្នផ្សេងៗត្រូវបានរងការវាយប្រហារ។ បច្ចុប្បន្ននេះ មនុស្សជាង ១២ សែននាក់នៅតំបន់ហ្គាហ្សាត្រូវបានផ្លាស់ទីលំនៅចេញ ដោយសារតែការភ័យខ្លាច ការព្រួយបារម្ភអំពីសុវត្ថិភាព និងការបំផ្លិចបំផ្លាញផ្ទះសម្បែងរបស់ពួកគេ៕