សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ កំពូលក្រុមហ៊ុនបច្ចេកវិទ្យាវ៉ៃឆ្លាត AI ដ៏ល្បីល្បាញ OpenAI ដែលបានចាប់កំណើតតាំងតែពីឆ្នាំ២០១៥នោះ កំពុងបានធ្វើឲ្យពិភពលោកមានការប្រែប្រួលយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ជាពិសេសលើមុខងារនៃបច្ចេកវិទ្យា ChatGPT របស់ខ្លួនដែលវាទើបតែបានដាក់ឲ្យប្រើប្រាស់កាលពីឆ្នាំ២០២២កន្លងទៅប៉ុណ្ណោះ។
ចាប់តាំងពីដំបូងមក OpenAI ព្រមទាំងម្ចាស់ភាគហ៊ុនវិនិយោគទាំងអស់បានដាក់ការប្តេជ្ញាចិត្តយ៉ាងច្បាស់លាស់ថា នឹងមិនចូលរួមពាក់ព័ន្ធទៅនឹងសកម្មភាពយោធារបស់រដ្ឋាភិបាលអាមេរិកឡើយ ប៉ុន្តែអ្វីៗហាក់ដូចជាមិនមានការស្ថិតស្ថេររហូតនោះឡើយ ដោយថ្មីៗនេះ OpenAI បានធ្វើការប្រកាសគួរឲ្យភ្ញាក់ផ្អើលថា នឹងចាប់ផ្តើមសហការជាមួយនឹងកងកម្លាំងយោធាអាមេរិកដើម្បីអភិវឌ្ឍគម្រោងមួយចំនួនដែលក្នុងនោះផ្តោតសំខាន់ទៅលើបញ្ហា Cybersecurity ឬសន្តិសុខតាមប្រព័ន្ធអនឡាញ។
អនុប្រធានក្រុមហ៊ុន OpenAI អ្នកនាង Anna Makanju ថ្លែងនៅក្នុងបទសំភាសមួយជាមួយនឹងក្រុមអ្នកកាសែត The Bloomberg កាលពីថ្ងៃអង្គារដើមសប្តាហ៍កន្លងមកនេះនាទីក្រុងដាវ៉ូស ប្រទេសស្វីស ក្នុងព្រឹត្តិការណ៍វេទិកាសេដ្ឋកិច្ចពិភពលោក World Economic Forum បានធ្វើការអះអាងអំពីកិច្ចសហប្រតិបត្តិការដែលគួរឲ្យភ្ញាក់ផ្អើលនេះ។
អ្នកនាង Anna បានបញ្ជាក់ថា តាំងតែពីឆ្នាំ២០២៣មក ChatGPT របស់ក្រុមហ៊ុន OpenAI បានចាប់ផ្តើមធ្វើការអភិវឌ្ឍនូវមុខងារដ៏សំខាន់មួយសម្រាប់ក្រសួងការពារជាតិដោយមានការចូលរួមការងារពីភ្នាក់ងារស្រាវជ្រាវយោធារបស់អាមេរិកហៅកាត់ថា DARPA ដោយសង្ឃឹមថាវានឹងអាចស្វែងរកវិធីសាស្ត្រមួយចំនួនក្នុងប្រយុទ្ធប្រឆាំងបទល្មើសអនឡាញ ក៏ដូចជាវិធីសាស្ត្រក្នុងការទប់ស្កាត់កុំឲ្យមានករណីធ្វើអត្តឃាតពីសំណាក់ក្រុមមន្ត្រីយោធាចាស់ៗ និងចូលនិវត្ត។
នាង Anna បន្តទៀតថាថ្មីៗនេះក្រុមហ៊ុនបានសម្រេចចិត្តធ្វើការកែសម្រួលគោលការណ៍សេវាកម្ម ឬ Term of service នៅ ChatGPT ត្រង់ចំណុច Military and Warfare ដែលត្រឡប់មកវិញនូវការអនុញ្ញាតឲ្យមានលទ្ធភាពក្នុងការប្រើប្រាស់មុខងាររបស់ ChatGPT មួយចំនួនសម្រាប់វិស័យយោធាជំនួសវិញ។
តាមការប្រកាសដោយ OpenAI បានឲ្យដឹងដែរថា ក្រុមហ៊ុនក៏កំពុងធ្វើការជាមួយនឹងរដ្ឋាភិបាលអាមេរិកដើម្បីពង្រឹងសន្តិសុខអនឡាញឲ្យបានកាន់តែល្អប្រសើរនូវចំពោះមុខព្រឹត្តិការណ៍បោះឆ្នោតសកលដែលកាន់តែខិតចូលមកដល់នោះផងដែរ ទាំងមុខងារស្វែងរកព័ត៌មានមិនពិត និងមុខងារបំផ្លាញការក្លែងបន្លំសម្លេងឆ្នោតផងដែរ។
ទោះបីជាយ៉ាងណាក្តី ការផ្លាស់ប្តូរនេះហាក់ដូចជាមិនមានអ្វីគួរឲ្យភ្ញាក់ផ្អើលឡើយដោយសារតែក្រុមហ៊ុនបច្ចេកវិទ្យាធំៗរបស់ពិភពលោក និងមានមូលដ្ឋាននៅអាមេរិកនោះគឺតែងតែសហការជាមួយនឹងក្រសួងការពារជាតិអាមេរិកក្នុងការអភិវឌ្ឍគម្រោងនានាដែលក្នុងនោះ រួមមាន Microsoft Corp ដែលជាអ្នកវិនិយោគធំជាងគេរបស់ OpenAI ផងព្រមទាំងក្រុមហ៊ុន Anthropic ផង និង Google ផងដែរ៕
Account
Security
Favourite Content