កែប ៖ ម្រេចសុធី គឺជាឈ្មោះចំការម្រេចដ៏ល្បីល្បាញមួយកន្លែងដែលមានទីតាំងស្ថិតនៅតំបន់ភ្នំវល្លិ៍ ខេត្តកែប ត្រូវបានបង្កើតឡើងប្រមាណជិត២០ឆ្នាំមកហើយ។ ផ្ទៃដីទាំងមូលមានទំហំ​ប្រមាណជា ៣ហិកតា ក្នុងនោះផ្ទៃដីដាំម្រេចមាន២ហិកតា និង១ហិកតាទៀតសម្រាប់ដាំដំណាំចម្រុះផ្សេងៗ។

បើតាមអ្នកស្រី ស៊ន សុធី ដែលជាម្ចាស់ចំការម្រេចខាងលើនេះបានឱ្យដឹងអំពីសាវតារបស់ដំណាំម្រេច​ថា ផលិតផលម្រេចបានចាប់កំណើតនៅក្នុងខេត្តកែប ប្រមាណជាជាង១០០ឆ្នាំមកហើយ ពោលគឺតាំងពី​ខេត្តកែបមិនទាន់បំបែកចេញពីខេត្តកំពត។ ហេតុដូច្នេះហើយបានគេជាប់ឈ្មោះហៅ ម្រេចដែលមាន​គុណភាពខ្ពស់របស់កម្ពុជាថា ជាម្រេចកំពត។

អ្នកស្រីបន្តឱ្យដឹងទៀតថា ម្រេចកំពតដែលសុទ្ធល្អគឺអាចផលិតបានតែក្នុងខេត្តកែប និងស្រុកមួយ ចំនួនរបស់ខេត្តកំពត ដែលមានអាកាសធាតុល្អ និងដីមានជីវជាតិតែប៉ុណ្ណោះ ហើយផលិតផលម្រេចនេះដែរ ត្រូវបានទទួលស្គាល់ថាជាម៉ាក់សម្គាល់ភូមិសាស្ត្រទំនិញ។ យ៉ាងណាក៏ដោយ លើសពីកសិករដាំដុះម្រេចទូទៅ អ្នកស្រី ស៊ន សុធី បានបើកចំការរបស់ខ្លួន ទទួលស្វាគមន៍ភ្ញៀវទេសចរដែលមានទាំងភ្ញៀវជាតិ និងអន្តរជាតិ។ ក្នុងរយៈពេលប្រមាណជិត២០ឆ្នាំកន្លងមកនេះ ចំការម្រេចសុធី បានទទួលភ្ញៀវអន្តរជាតិដែលមកពីជាង៧០ប្រទេស ទូទាំងពិភពលោក។ រីឯមូលហេតុនៃការទទួលភ្ញៀវនេះ គឺអ្នកស្រីចង់ឱ្យភ្ញៀវទេសចរបានរៀន​សូត្រ និងយល់ដឹងអំពី​លក្ខខណ្ឌ ក៏ដូចជាដំណើរការនៃការដាំដុះម្រេច។ ពិសេសជាងនេះគឺចង់ឱ្យអ្នកទេសចរបានដឹងអំពី​ផលលំបាកនៅក្នុងការថែទាំដំណាំម្រេច ទម្រាំអាចទទួលបានផលិតផលម្រេច ដែលមានគុណភាពខ្ពស់។

អ្នកស្រី ស៊ន សុធី បានបញ្ជាក់ទៀតថា៖

«យើងមិនបានគិតប្រាក់ ឬលក់សំបុត្រសម្រាប់ចូល ទស្សនាចំការម្រេចរបស់យើងទេ លើសពីនេះយើងមានទាំងមគ្គុទេសក៍ចាំនាំផ្លូវ និងណែនាំអំពី​ចំណេះ​ដឹងទូទៅរបស់ដំណាំម្រេចដោយមិនគិតកម្រៃផងដែរ»។

ប្ដូរពីការយកលក់សំបុត្រចូលទស្សនា អ្នកស្រី និងបុគ្គលិកជាង១០នាក់ផ្សេងទៀត បានបង្កើតជាផលិតផលម្រេចកែច្នៃ និងសម្រេចមួយចំនួនដូចជា កាហ្វេម្រេច តែម្រេច ជ្រក់ម្រេច និងគ្រាប់ម្រេចជាវត្ថុធាតុដើម ដែលមានការវេចខ្ចប់ទៅតាមស្តង់ដារត្រឹមត្រូវ។

អ្នកស្រីបានបន្តឱ្យដឹងថា ផលិតផលរបស់ខ្លួនភាគច្រើនលក់បានតាមរយៈភ្ញៀវទេសចរដែលចូលមកទស្សនា មួយផ្នែកទៀតគឺផ្ញើទៅក្រៅប្រទេស និងមួយផ្នែកទៀតគឺដាក់លក់នៅតាមតំបន់គោលដៅ ទេសចរណ៍។ លើសពីកម្រៃដែលអ្នកស្រីទទួលបានពីការលក់ផលិតផលម្រេច ចំការម្រេចសុធីក៏បានក្លាយជា កន្លែងផ្ដល់ការងារធ្វើដល់បុគ្គលិកដែលភាគច្រើនជាស្ត្រីរស់នៅក្នុងតំបន់នោះដោយផ្ទាល់ និងដោយ​ប្រយោល​ផងដែរ។

គួរបញ្ជាក់ថា ទីផ្សារនាំចេញ និងតម្លៃម្រេចរបស់កម្ពុជាកាលពីឆ្នាំ២០២៤ កន្លងទៅ មានការ​កើន​ឡើងគួរឱ្យកត់សម្គាល់ ពោលគឺក្នុងរយៈពេល១១ខែនៃឆ្នាំ២០២៤ កម្ពុជារកចំណូលបាន​ជាង៣៤លានដុល្លារពីការនាំចេញម្រេច​ទៅកាន់ទីផ្សារអន្តរជាតិ មានការកើនឡើងជិត១៥០% បើធៀបនឹងរយៈពេលដូចគ្នាកាលពីឆ្នាំមុន៕