ភ្នំពេញ៖ សមាគមមីក្រូហិរញ្ញវត្ថុកម្ពុជា (សមក) បានបង្ហាញការប្តេជ្ញាចិត្តយ៉ាងមុតមាំជាថ្មី ក្នុងការគាំទ្រកិច្ចពិគ្រោះយោបល់ពហុភាគីស្តីពីវិស័យមីក្រូហិរញ្ញវត្ថុនៅកម្ពុជា ដែលដឹកនាំដោយធនាគារជាតិនៃកម្ពុជា និងអង្គការសហប្រជាជាតិនៅកម្ពុជា ដោយសង្កត់ធ្ងន់អំពីតួនាទីរបស់ខ្លួនក្នុងការជំរុញសេវាហិរញ្ញវត្ថុប្រកបដោយការទទួលខុសត្រូវ ពង្រឹងកិច្ចការពារអតិថិជន និងការធានានូវនិរន្តរភាពសម្រាប់វិស័យ។ ការប្តេជ្ញាចិត្តនេះបានធ្វើឡើងក្នុងកិច្ចពិគ្រោះយោបល់កម្រិតខ្ពស់លើកទី៣ ជាមួយពហុភាគីពាក់ព័ន្ធស្តីពីមីក្រូហិរញ្ញវត្ថុនៅកម្ពុជា ដែលរៀបចំធ្វើឡើងដោយធនាគារជាតិនៃកម្ពុជា និងអង្គការសហប្រជាជាតិនៅកម្ពុជានៅថ្ងៃទី០៩ ខែកញ្ញា ឆ្នាំ២០២៥ និងកិច្ចពិគ្រោះយោបល់ស្តីពីការចូលរួមរបស់វិនិយោគិនប្រកបដោយការទទួលខុសត្រូវនៅថ្ងៃទី១០ ខែកញ្ញា ឆ្នាំ២០២៥ នៅរាជធានីភ្នំពេញ។

យោងសេចក្តីប្រកាសព័ត៌មានរបស់សមាគមមីក្រូហិរញ្ញវត្ថុកម្ពុជានាថ្ងៃទី២៥ ខែកញ្ញា ឆ្នាំ២០២៦ បានឱ្យដឹងថា៖ ដំណើរការកិច្ចពិគ្រោះយោបល់ដែលរៀបចំឡើងដោយធនាគារជាតិនៃកម្ពុជា និងអង្គការសហប្រជាជាតិនៅកម្ពុជានេះ បានប្រមូលផ្តុំភាគីពាក់ព័ន្ធសំខាន់ៗ ដូចជា និយតករ គ្រឹះស្ថានហិរញ្ញវត្ថុ វិនិយោគិន ដៃគូអភិវឌ្ឍន៍ និងអង្គការសង្គមស៊ីវិល ដើម្បីលើកឡើងពីឱកាស និងដោះស្រាយបញ្ហាប្រឈមក្នុងវិស័យមីក្រូហិរញ្ញវត្ថុកម្ពុជា។ គំនិតផ្តួចផ្តើមនេះ មានគោលបំណងជំរុញឱ្យមានកិច្ចសន្ទនាប្រកបដោយបរិយាបន្នក្នុងចំណោមតួអង្គសំខាន់ៗ បង្កើតការយល់ដឹងរួមគ្នាអំពីបញ្ហាប្រឈមជាប្រព័ន្ធ និងស្វែងរកដំណោះស្រាយដែលកំពុងកើតមាន និងអាចកើតមានក្នុងពេលអនាគតដើម្បីពង្រឹងវិស័យធនាគារ និងហិរញ្ញវត្ថុ។

ក្នុងចំណោមសកម្មភាពអាទិភាពចំនួន២២ ដែលបានព្រមព្រៀងគ្នា សកម្មភាពចំនួន១០ ត្រូវបានបញ្ចប់ ហើយសកម្មភាពចំនួន១២ កំពុងដំណើរការ។ សមាគមមីក្រូហិរញ្ញវត្ថុកម្ពុជា ទទួលភារកិច្ចសហការដឹកនាំសកម្មភាពអាទិភាពចំនួន៦ ដែលក្នុងនោះ សកម្មភាពចំនួន៣ ត្រូវបានបញ្ចប់ ហើយសកម្មភាពចំនួន៣ កំពុងដំណើរការយ៉ាងល្អ។ សកម្មភាពទាំងនេះរួមមាន ក្របខណ្ឌលើកទឹកចិត្ត ការវាយតម្លៃដោយភាគីទី៣ នូវក្រមប្រតិបត្តិក្នុងចំណោមគ្រឹះស្ថានធនាគារ និងហិរញ្ញវត្ថុចំនួន៣០ ស្តង់ដារកិច្ចសន្យាឥណទានរួមប្រកបដោយតម្លាភាព ការហាមឃាត់ការប្រើប្រាស់ប័ណ្ណកម្មសិទ្ធិដីសមូហភាពជនជាតិដើមភាគតិច(ICLTs)ធ្វើជាទ្រព្យធានា ព្រមទាំងផ្តល់ការរៀបចំឥណទានឡើងវិញដល់អតិថិជនដែលជួបបញ្ហាលំបាកផ្នែកហិរញ្ញវត្ថុ មូលនិធិវិស័យ ការសិក្សាអំពីការកំណត់តម្លៃប្រកបដោយការទទួលខុសត្រូវ  ការបង្កើតមជ្ឈមណ្ឌលគាំពារអ្នកប្រើប្រាស់សេវាហិរញ្ញវត្ថុ(FCC) គោលការណ៍ណែនាំស្តីពីចំណេះដឹងផ្នែកហិរញ្ញវត្ថុ និងការសិក្សាអំពីកម្ចីក្រៅផ្លូវការដែលធ្វើឡើងដោយភាគីឯករាជ្យ។

បន្ថែមពីនេះ សមាគមមីក្រូហិរញ្ញវត្ថុកម្ពុជាក៏ទទួលបានភារកិច្ចគាំទ្រសកម្មភាពអាទិភាពចំនួន១៣ ផ្សេងទៀតដែលក្នុងនោះសកម្មភាពអាទិភាពចំនួន៥ត្រូវបានបញ្ចប់ និងសកម្មភាពអទិភាពចំនួន៨កំពុងដំណើរការ។ សកម្មភាពអទិភាពទាំងនេះរួមមាន ការពង្រឹងការអនុវត្តក្រមប្រតិបត្តិនិងវិធានផ្តល់ឥណទាន ការហាមឃាត់ការយកប័ណ្ណក្រីក្រធ្វើជាទ្រព្យបញ្ចាំ បទប្បញ្ជត្តិរៀបចំឥណទានឡើងវិញ ក្រុមការងារប្រឹក្សាអំពីបញ្ហាបំណុល និយមន័យប្រតិបត្តការឥណទានមីក្រូហិរញ្ញវត្ថុ ការរៀបចំផែនទីប័ណ្ណកម្មសិទ្ធិដីសមូហភាពជនជាតិដើមភាគតិចនិងផ្សព្វផ្សាយសហគមកសិកម្មសម្រាប់ជនជាតិដើមភាគតិចគម្រោងសាកល្បងធានារ៉ាប់រងកសិកម្មនិងប្រកាសស្តីពីការហាមឃាត់អាជ្ញាធរមូលដ្ឋានមិនឱ្យបញ្ជាក់ប័ណ្ណកម្មសិទ្ធិដីធ្លី។

កិច្ចការដ៏លេចធ្លោមួយគឺ ការបង្កើតមជ្ឈមណ្ឌលគាំពារអ្នកប្រើប្រាស់សេវាហិរញ្ញវត្ថុ (FCC) ដែលនឹងដើរតួជាស្ថាប័នឯករាជ្យដោយមានគណៈគ្រប់គ្រង និងក្រុមប្រឹក្សាភិបាលផ្ទាល់ខ្លួន ត្រូវបានបង្កើតឡើងក្នុងគោលបំណងពង្រឹងកិច្ចការពារអ្នកប្រើប្រាស់តាមរយៈការដោះស្រាយបណ្តឹងរបស់អ្នកប្រើប្រាស់សេវាហិរញ្ញវត្ថុ។ តាមរយៈបណ្តាញទូរស័ព្ទបណ្តឹង យន្តការនៅតាមសាខាផ្ទាល់របស់គ្រឹះស្ថានធនាគារនិងហិរញ្ញវត្ថុ និងតាមរយៈបណ្តាញឌីជីថល មជ្ឈមណ្ឌលនេះ ផ្តល់ជូនអ្នកប្រើប្រាស់នូវយន្តការបណ្តឹងផ្លូវការ ដើម្បីស្វែងរកដំណោះស្រាយនៅពេលមានការប្រព្រឹត្តមិនត្រឹមត្រូវ ឬការអនុវត្តបែបរំលោភបំពានដោយគ្រឹះស្ថានធនាគារ និងមីក្រូហិរញ្ញវត្ថុ។ តាមរយៈការផ្តោតសំខាន់លើការត្រួតពិនិត្យ និងការដោះស្រាយបណ្តឹងតវ៉ា មជ្ឈមណ្ឌលគាំពារអ្នកប្រើប្រាស់សេវាហិរញ្ញវត្ថុ មានគោលបំណងលើកកម្ពស់សិទ្ធិអ្នកប្រើប្រាស់សេវាហិរញ្ញវត្ថុកម្ពុជា ដោយផ្តល់សំឡេងឱ្យពួកគេកាន់តែខ្លាំង ធ្វើឱ្យប្រសើរឡើងនូវគណនេយ្យភាពក្នុងវិស័យ និងជួយកាត់បន្ថយភាពភ័យខ្លាចរបស់ម្ចាស់បណ្តឹង។

លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជាបានមានប្រសាសន៍ថា៖

«កិច្ចពិគ្រោះយោបល់នេះ ជាជំហានវិវត្តដ៏សំខាន់មួយសម្រាប់វិស័យហិរញ្ញវត្ថុនៅកម្ពុជា។ សមាគមប្តេជ្ញាធានាឱ្យបានថា វិស័យមីក្រូហិរញ្ញវត្ថុនៅតែបន្តជាកម្លាំងចលករដ៏សំខាន់មួយដើម្បីពង្រឹងសេដ្ឋកិច្ច កាត់បន្ថយភាពក្រីក្រ និងជំរុញកំណើនសេដ្ឋកិច្ចប្រកបដោយបរិយាប័ន្ន។ យើងស្វាគមន៍វិនិយោគិន និងដៃគូទាំងអស់ដែលមានចក្ខុវិស័យរួមគ្នាជាមួយ​យើងក្នុងការសម្រេចឱ្យបាននូវប្រព័ន្ធហិរញ្ញវត្ថុប្រកបដោយនិរន្តរភាព ការទទួលខុសត្រូវ និងភាពធន់»។

សមាគមមីក្រូហិរញ្ញវត្ថុកម្ពុជា សូមអំពាវនាវទៅកាន់វិនិយោគិនក្នុងវិស័យហិរញ្ញវត្ថុទាំងក្នុងស្រុក និងអន្តរជាតិ ឱ្យចូលរួមគាំទ្រយ៉ាងសកម្មដល់កិច្ចពិគ្រោះយោបល់ដែលកំពុងបន្តដំណើរការនេះតាមរយៈការវិនិយោគលើគំនិតផ្តួចផ្តើមផ្នែកហិរញ្ញវត្ថុប្រកបដោយការទទួលខុសត្រូវ ដែលផ្តល់អាទិភាពដល់ផលចំណេញផ្នែកហិរញ្ញវត្ថុ និងផលជះសង្គមជាវិជ្ជមាន។

លោកជំទាវ ឌិត នីតា បានបន្ថែមថា៖

ទំនុកចិត្តរបស់វិនិយោគិនមានសារៈសំខាន់ណាស់ក្នុងការរក្សាស្ថិរភាព និងការរីកចម្រើននៃប្រព័ន្ធហិរញ្ញវត្ថុរបស់កម្ពុជា។ យើងរួមគ្នាអាចធានាបាននូវលទ្ធភាពទទួលបានសេវាហិរញ្ញវត្ថុ ដែលជួយលើកកម្ពស់សិទ្ធិសហគមន៍ និងលើកកម្ពស់សេដ្ឋកិច្ចរបស់ប្រទេសកម្ពុជា»។

សូមជម្រាបថា សមាគមមីក្រូហិរញ្ញវត្ថុកម្ពុជា (សមក) គឺជាសមាគមវិជ្ជាជីវៈ មានគោលដៅលើកកម្ពស់ការអនុវត្តមីក្រូហិរញ្ញវត្ថុប្រកបដោយការទទួលខុសត្រូវ និងនិរន្តរភាពក្នុងប្រទេសកម្ពុជា។ តាមរយៈកិច្ចសហការជាមួយគ្រឹះស្ថាន​ហិរញ្ញវត្ថុ និងភាគទុនិក សមាគមធ្វើការងារដើម្បីការពារសិទ្ធិអតិថិជន និងជំរុញឱ្យមានវិស័យហិរញ្ញវត្ថុប្រកបដោយបរិយាបន្នដែលផ្តល់អត្ថប្រយោជន៍ដល់សហគមន៍នានានៅទូទាំងប្រទេស៕