​ភ្នំពេញ ៖ វីរៈប៊ុនថាំ ដែលជា​ក្រុមហ៊ុន ឡូជីស្ទិក ដ៏ធំមួយ​នៅកម្ពុជា​ គ្រោង​នឹង​បញ្ជាទិញរថយន្តអគ្គិសនីសម្រាប់ដឹក​ទំនិញ​ប្រមាណ ៣០០គ្រឿងបន្ថែម ដើម្បីបម្រើដល់ការដឹកជញ្ជូន ដែលធ្វើឲ្យក្រុមហ៊ុន​មួយនេះមានរថយន្តធន់ធំដើរដោយ​ថាមពលអគ្គិសនីកើនដល់ ៥០០គ្រឿង​នៅឆ្នាំ២០២៦ ហើយនឹងក្លាយជា​ក្រុមដឹកជញ្ជូនឈានមុខគេមួយនៅកម្ពុជា ក្នុងការប្រើប្រាស់រថយន្តអគ្គិសនីលើវិស័យ​ដឹកជញ្ជូន។

អ្នកឧកញ៉ា សួរ វីរៈ នាយកប្រតិបត្តិក្រុមហ៊ុន វីរៈ ប៊ុនថាំ អ៊ិចប្រេស បានប្រាប់បណ្តាញផ្សព្វផ្សាយ AMS ថា បច្ចុប្បន្នក្រុមហ៊ុនរបស់លោកបានប្រើប្រាស់រថយន្តអគ្គិសនីជាង ២០០គ្រឿង សម្រាប់ដឹកអ្នកដំណើរ និង​ដឹកជញ្ជូនទំនិញ ហើយក្នុងឆ្នាំ២០២៦នេះ ក្រុមបានបញ្ជាទិញរថយន្តអគ្គិសនីបន្ថែមប្រមាណ ៣០០គ្រឿងទៀត។ បើតាមអ្នកឧកញ៉ា សួរ វីរៈ បានឱ្យដឹងថា ជាមធ្យម រថយន្តអគ្គិសនីរបស់ក្រុមហ៊ុន វីរៈ ប៊ុនថាំ មានតម្លៃចន្លោះពី ៥ម៉ឺនដុល្លារ ទៅ ៥ម៉ឺន ៨ពាន់ដុល្លារ ក្នុង១គ្រឿង។

អ្នកឧកញ៉ា សួរ វីរៈ ៖

«៣០០គ្រឿងយើងកាហ្មង់បន្ថែមនេះកំពុងមកបណ្ដើរៗ។ គោលដៅយើងរៀងរាល់ឆ្នាំយើងទិញប្រហែលជា ៣០០ទៅ៤០០គ្រឿង ព្រោះយើងកំពុងកាត់បន្ថយរថយន្តម៉ាស៊ូត ហើយយើងនឹងឈានទៅប្រើរថយន្តអគ្គិសនីទាំងស្រុង។ នេះជា​ផ្នែកមួយនៃការលើកកម្ពស់ការប្រើប្រាស់រថយន្តអគ្គិសនីនៅកម្ពុជា»។

នៅក្នុងឆ្នាំ២០២៦នេះ ក្រុមហ៊ុន វីរៈ ប៊ុនថាំ ក៏មានផែនការសាងសង់ស្ថានីយសាករថយន្តអគ្គិសនីបន្ថែមឱ្យបានគ្រប់រាជធានី-ខេត្ត និងឲ្យបានចំនួន ៣០០ស្ថានីយនៅក្នុងក្រុងភ្នំពេញ ដោយស្ថានីយសាករថយន្តអគ្គិសនីនីមួយៗមានតម្លៃចន្លោះពី ១២ម៉ឺនដុល្លារ ទៅ១៦ម៉ឺនដុល្លារ។

លោក ជួន មករា អ្នកគ្រប់គ្រងផ្នែកលក់នៃក្រុមហ៊ុន វីរៈ ប៊ុនថាំ បានកត់សម្គាល់ពីកំណើននៃការប្រើប្រាស់ស្ថានីយសាករថយន្តអគ្គិសនីនៅកម្ពុជា ដោយលោកបញ្ជាក់ថា មានភាពងាយស្រួល និងចំណាយតិច។​ ជាទូទៅ ការប្រើប្រាស់រថយន្តអគ្គិសនីចម្ងាយ ១០០គីឡូម៉ែត្រ ត្រូវប្រើថាមពលប្រហែល ១០គីឡូវ៉ាត់ ឬចំណាយ ១៣ ០០០រៀល​។

លោកបញ្ជាក់ថា ៖

«អត្ថប្រយោជន៍នៃការប្រើប្រាស់ឡានអគ្គិសនីហ្នឹងជួយបរិស្ថាន ហើយវាស្ងាត់ ហើយចំណេញ ១ ភាគ ៣ នៃការប្រើសាំង។ ឧទាហរណ៍ថា ប្រើសាំងចាយអស់១០ដុល្លារ បើយើងប្រើអគ្គិសនីចាយអស់តែ ៣ដុល្លារទេ»។

សូមជម្រាបថា បច្ចុប្បន្ន ក្រុមហ៊ុន វីរៈ ប៊ុនថាំ បានប្រើប្រាស់រថយន្តអគ្គិសនីប្រមាណ ២០ភាគរយ និងជំរុញឲ្យបាន ៤០ភាគរយក្នុងឆ្នាំ២០២៦នេះ។ សម្រាប់ផែនការ ៤ឆ្នាំបន្ទាប់ ក្រុមហ៊ុននឹងជំរុញការប្រើប្រាស់រថយន្តអគ្គិសនីឲ្យបាន ៩០ភាគរយ​ ខណៈដែលប្រទេសកម្ពុជា គ្រោង​​ជំរុញ​ការប្រើប្រាស់រថយន្ត និងយានយន្តអគ្គិសនីឲ្យ​បាន ៤០ ភាគរយ រហូតដល់ឆ្នាំ២០៥០៕ ខន ណារី Apsara Tonigh