សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កាលពីដើមឡើយ ប្រជាពលរដ្ឋកម្ពុជាភាគច្រើនទិញផ្ទះ ដោយគិតតែពីទីជម្រកត្រឹមត្រូវ និងមានភាពសមរម្យតែប៉ុណ្ណោះ ដោយមិនទាន់បានគិតគូរពីទីតាំងសក្ដានុពល ឬទីតាំងដែលមានផាសុកភាពសម្រាប់ការរស់នៅច្រើននោះទេ ប៉ុន្តែបច្ចុប្បន្ននេះ ប្រជាពលរដ្ឋកម្ពុជាភាគច្រើនបានគិតគូរច្រើនទៅលើការរស់នៅប្រកបដោយគុណភាពនៃជីវិត ជាពិសេសចាប់ពីឆ្នាំ២០២៣នេះតទៅ ប្រជាពលរដ្ឋកម្ពុជានឹងគិតលើបញ្ហានេះកាន់តែច្រើន ដែលជំរុញឱ្យអ្នកអភិវឌ្ឍន៍ត្រូវការកែប្រែបន្ថែមទៀតទៅលើគម្រោងរបស់ខ្លួនដើម្បីបង្កើនភាពទាក់ទាញផងដែរ។
លោក ឡុង បូរិន្ទ នាយកប្រតិបត្តិបុរី ទីលាង បានមានប្រសាសន៍ឱ្យដឹងថា ចាប់ពីឆ្នាំ២០២៣នេះទៅ និន្នាការស្រទាប់យុវវ័យ ឬក៏បងប្អូនប្រជាពលរដ្ឋ ចង់បានការរស់នៅដែលមានផាកសុខភាព និងភាពងាយស្រួល ដូចជាមានកន្លែងកម្សាន្ត មានសួនច្បារសម្រាប់កម្សាន្តជាមួយកូនៗ និងមានផ្សារ ឬកន្លែងលក់ទំនិញនៅជិតផ្ទះជាដើម ។
លោកបន្តថា ៖
“ចាប់ពីពេលនេះតទៅប្រជាពលរដ្ឋដែលទិញផ្ទះមិនត្រឹមតែចង់បានផ្ទះសម្រាប់រស់នៅមួយមុខទេ តែពួកគាត់ចង់បានការរស់នៅដែលប្រកបដោយសេចក្ដីសុខទាំងផ្លូវកាយ និងផ្លូវចិត្ត ។ នេះជានិន្នាការថ្មីមួយដែលអាចបញ្ជាក់ផងដែរថា ឆ្នាំ២០២៣នេះ ជាឆ្នាំមួយដែលវិស័យសហគ្រាសធុនតូច និងមធ្យម ក៏ដូចជាការលក់រាយ នឹងមានការកើនឡើង ដើម្បីប៉ះប៉ូវឡើងវិញបន្ទាប់ពីមានវិបត្តិកូវីដ១៩ នាពេលកន្លងមក”
លោកបន្តថា ៖
“អ្វីដែលយើងមើលឃើញជាក់ស្ដែងនាពេលបច្ចុប្បន្ននេះ បុរីលំនៅឋានដែលអភិវឌ្ឍន៍ក្រោយៗ បានទុកដីទំនេរច្រើនទាំងផ្លូវចូលក្នុងបុរី និងមានទីធ្លាសួនច្បារសម្រាប់អ្នករស់នៅក្នុងបុរី បានសម្រាកកម្សាន្តពេលល្ងាចៗជាមួយគ្រួសារ ដែលខុសពីការអភិវឌ្ឍមុនៗគឺរកតែកន្លែងចតរថយន្តសឹងតែមិនមានផងនោះ។ នៅក្នុងបុរី និងនៅតាមផ្ទះនីមួយៗ ម្ចាស់បុរីក៏បានដាំដើមឈើដោយភាគច្រើនជាដើមឈើហូបផ្លែជូនដល់ម្ចាស់ផ្ទះផងដែរ ដែលធ្វើឱ្យបរិយាកាសនៅក្នុងបុរីកាន់តែមានភាពស្រស់ស្រាយបន្ថែមទៀត”
លោក ស៊ីម បូវិសាល ទីប្រឹក្សានៃសមាគមអ្នកផ្តល់ប្រឹក្សាសំណង់អគារបៃតងកម្ពុជា ក៏បានឱ្យដឹងផងដែរថា កាលពីដើមឡើយការអភិឌ្ឍបុរីធ្វើឡើងនៅកណ្ដាលក្រុងដែលតម្លៃដីធ្លីនៅកណ្ដាលក្រុងក៏មានតម្លៃថ្លៃ ដូច្នេះពួកគេត្រូវការសន្សំសំចៃដីដើម្បីអភិវឌ្ឍន៍បានផ្ទះច្រើនខ្នង ប៉ុន្តែមកដល់ពេលបច្ចុប្បន្ននេះ ការអភិវឌ្ឍលំនៅឋាន បុរីត្រូវបានងាកទៅកាន់ជាយក្រុងកាន់តែច្រើន ហើយដីធ្លីនៅតំបន់ទាំងនោះក៏មានតម្លៃទាបជាងនៅតំបន់កណ្ដាលក្រុង ដូច្នេះបុរីលំនៅឋានភាគច្រើនក៏ត្រូវសាងសង់ឡើងដោយទុកដីទំនេរធំៗជាងមុន មានសួនច្បារ មានដាំដើមឈើនៅក្នុងបុរី និងមានបុរីខ្លះទៀតដាំដើមឈើតាំងពីផ្លូវចូលផងដែរ ។
លោកបន្តថា បុរីបច្ចុប្បន្ននេះ គឺត្រូវមានការប្រកួតប្រជែងលើការរចនាមិនត្រឹមតែក្នុងផ្ទះប៉ុណ្ណោះទេ តែក៏មានការទាក់ទាញផ្នែកខាងក្រៅ រួមមានហេដ្ឋារចនាសម្ព័ន្ធជុំវិញបុរី ហេដ្ឋារចនាសម្ព័ន្ធក្នុងបុរីផ្ទាល់ ដើម្បីឱ្យការរស់នៅរបស់ប្រជាពលរដ្ឋដែលជាអ្នកទិញលំនៅឋានក្នុងបុរីប្រកបដោយគុណភាព ៕
Account
Security
Favourite Content