សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទម្លាប់នៃការសន្សំ គឺជាទម្លាប់ល្អមួយដែលប្រៀបបានទៅនឹងវិន័យផ្ទាល់ខ្លួនសម្រាប់មនុស្សគ្រប់គ្នា ហើយវាគួរតែត្រូវបានបណ្ដុះបណ្ដាលពីសំណាក់ឪពុកម្ដាយទៅកាន់កូនៗ តាំងតែពីវ័យក្មេងមក។
មនុស្សភាគច្រើនអាចនឹងមើលរំលងនូវទម្លាប់សន្សំនេះ ដោយយល់ថាវាមិនមានភាពចាំបាច់សម្រាប់ក្មេងៗនោះទេ ព្រោះពួកគេមិនទាន់មានប្រភពចំណូល និងមានការងារជាក់លាក់ដូចមនុស្សពេញវ័យ។ ដោយឡែក សម្រាប់អ្នកជំនាញ ទម្លាប់សន្សំនេះ បើមានជាប់ខ្លួនតាំងតែពីវ័យកុមារ គឺកាន់តែល្អ ព្រោះវាជាទម្លាប់មួយដែលអាចជំរុញឱ្យកុមារធំធាត់ឡើងជាមួយនឹងការអត់ធ្មត់ និងសន្សំសំចៃ។
ឧទាហរណ៍ជាក់ស្ដែងដូចជាការពិភាក្សា រៀបចំផែនការសន្សំជាមួយកូនៗ និងដាក់គោលដៅឱ្យពួកគេ។ ក្នុងអំឡុងពេលសន្សំ ឪពុកម្ដាយ ឬអាណាព្យាបាលដើរតួនាទីសំខាន់ក្នុងការត្រួតពិនិត្យ និងជំរុញកូនៗឱ្យមានវិន័យជាប់លាប់។ នេះបើតាមការលើកឡើងរបស់លោក ហេង រមណី នាយកប្រតិបត្តិអាជីវកម្មសន្សំ និងសេវាកម្ម នៃគ្រឹះស្ថានមីក្រូហិរញ្ញវត្ថុ អេអឹមខេ។
លោក ហេង រមណី បានឱ្យដឹងទៀតថា៖
«រឿងលុយកាក់នេះ កុំតឹងតែងពេក ក៏កុំធូររលុងពេកជាមួយកូនៗ ធ្វើម៉េចឱ្យពួកគេយល់ពីតម្លៃរបស់លុយ ទើបពួកគេមិនចាយវាយខ្ជះខ្ជាយ»។
លោកបន្តថា ឪពុកម្ដាយភាគច្រើនមានទម្លាប់ទម្រើសកូនៗ ដោយទិញអ្វីតាមតែចិត្តរបស់កូន ដែលជាហេតុធ្វើឱ្យកូនមើលមិនឃើញពីភាពចាំបាច់ក្នុងការសន្សំ។
លោកបន្តគូសបញ្ជាក់ទៀតដែរថា៖
«ជាក់ស្ដែង ករណីកូនៗរបស់ខ្ញុំ ខ្ញុំតែងជំរុញឱ្យគាត់សន្សំលុយនៅពេលដែលគាត់ចង់ទិញអ្វីមួយ។ ធ្វើដូច្នេះ នៅពេលដែលគាត់សន្សំលុយគ្រប់សម្រាប់ទិញរបស់ណាមួយហើយ គាត់នឹងថែរក្សារបស់នោះ ដែលធ្វើឱ្យយើងជាឪពុកម្ដាយក៏មិនសូវចុះលុយដែរ»។
ត្រឡប់មកវិញ បើទោះជាតិចក្ដី ច្រើនក្ដី ការសន្សំគឺមានសារៈសំខាន់ណាស់ក្នុងជីវិតរស់នៅប្រចាំថ្ងៃ ហើយជាការល្អប្រសើរ ប្រសិនបើគ្រួសារមួយអាចបណ្ដុះបណ្ដាលកូនៗឱ្យមានទម្លាប់នេះ៕
Account
Security
Favourite Content